Read Batak Toba 2 KORINT 10 Bible Online

2 KORINT 10 - Batak Toba bible

2 KORINT 10

¹Alai ia ahu, si Paulus, huapoi ma hamu marhitehite lambok ni roha dohot habasaron ni Kristus. Na toruk roha do ahu maradophon hamu, anggo adop bohi be; alai na barani maralohon hamu, jumpa holang. [108†]

²Alai dipangido rohangku do: Naeng unang ma nian pola barani ahu, jumpa dompak, sian pos ni rohangku sipangasahononku di rohangku maradophon na deba, na mangarajumi hami songon parroha daging. [109†]

³Tutu do, di bagasan daging dope hami; alai ndada marguru tu daging parungkilonnami.

⁴Ai ndada mangihuthon daging sinjatanami marungkil, tung margogo do di Debata, laho mangarumpakkon angka tano bato. [110†]

⁵Ai hurumpakkon hami do angka pingkiran habisuhon ro di nasa roha na timbo, na hehe mangalo parbinotoan na sian Debata, jala huihoti hami do nasa roha, asa gabe pangoloi di Kristus i.

⁶Jala hobas do hami, maminsang nasa na so mangoloi, ia dung timpas pangoloionmuna.

⁷Bereng hamu ma na tandap di jolomuna: Molo adong na pos roha, mandok, Kristus nampuna ibana, diingot ma: Songon Kristus nampuna ibana, laos songon i do Kristus nampuna hami.

⁸Ai ndang tagamon tarila ahu, nang pe tamba dope pamujingku di huaso na nilehon ni Tuhan i di hami, laho pauliulihon hamu, ndada manegai. [111†]

⁹Unang ma songon na hupambibiari hamu marhite sian angka surat i.

¹⁰Ai angka surat i tutu, ninna, dokdok jala gogo; alai gale do, jumpa ro ibana, jala lea do hatana. [112†]

¹¹On ma dipingkiri halak i: Ia songon i hatanami na marhite sian surat, jumpa dao, songon i do ulaonnami, di na dompak hami. [113†]

¹²Tutu, ndang barani hami, pasaorhon manang patudoshon dirinami tu angka na manjuljulhon dirina. Angka parroha mago do nasida, ai na manuhati jala pasumansumanhon do nasida sama dirina. [114†]

¹³Alai ndang olo hami mamujimuji dirinami, ro di na so tingkina; sandok intap aturan, na pinatikkon ni Debata tu hami. Laos i do, umbahen na sahat hami ro di hamu. [115†]

¹⁴Ai ndada na pabalgabalgahon diri hami, so pola jolo ro hami mandapothon hamu; ai hami sahat, antong, nang tu hamu, mamaritahon barita na uli ni Kristus.

¹⁵Ndada lompo sian uhum pamujinami di hami, anggo di bagasan ulaon ni na leban; alai lam ganda situtu ma ulaonnami, dihirim rohanami, molo dung ganda haporseaonmuna sama hamu, marguru tu parturena, [116†]

¹⁶laho manjamitahon barita na uli, sahat ro di angka na di balik ni parbalohanmuna, unang pola huhasangaphon hami ulaon, naung tinurpukkon tu na asing siradotanna. [117†]

¹⁷Alai na mamuji dirina, marhitehite Tuhan i ma ibana mamuji! [118†]

¹⁸Ai ndada na tau na pajolohon dirina; na niuji ni Tuhan i, i do! [119†]