Read Batak Toba 2 KORINT 2 Bible Online

2 KORINT 2 - Batak Toba bible

2 KORINT 2

¹I. [1] Hupaputus do di bagasan rohangku, na so ulahanku be ro manopot hamu di bagasan arsak ni roha. [16†]

²Ai molo huarsahi hamu, ise ma palas rohangku muse? Nda ibana na huarsahi i?

³Jala ala ni i do, umbahen manurat ahu tu hamu, asa unang arsak ni roha tu ahu di harorongku, sian angka na patut palas rohangku; ai pos do rohangku di hamu sudena, naung halalas ni rohamuna saluhutna do halalas ni rohangki. [17†]

⁴Sian haporsuhon godang dohot sian ponjot ni roha do ahu manurat tu hamu mardongan iluilu godang, ndada asa marsak hamu, sandok asa ditanda hamu holong ni rohangku na sumurung mida hamu.

⁵Alai na mangarsahi i, ndada ahu niarsahanna, hamu saluhutna do, manang deba tahe, unang masalpuhu hatangku. [18†]

⁶Sae do tu na songon i pinsangpinsang sian na torop.

⁷Onpe, balik ma tagonan hamu manesa dosana jala mangapul ibana, unang dibondut arsak ni roha na torbang i ibana.

⁸Dibahen i huapoi hamu, patuduhon holong ni roha tu ibana.

⁹Laos i do tinembak ni surathu tu hamu, naeng tandaonku, manang na tau hamu, manang pangoloi hamu di na saluhutna. [19†]

¹⁰Alai molo disesa hamu dosana, dohot ma ahu. Ai manang dia na husesa, ala ni hamu do husesa i, di adopan ni Kristus. [20†]

¹¹Unang diangati sibolis i hita, ai ndada na so taboto tinahina i. [21†] II.

¹²Alai di na sahat ahu tu huta Troas, manjamitahon barita na uli na taringot tu Kristus, mungkap do nian pintu di ahu di bagasan Tuhan i. [22†]

¹³Alai ndang marhasonangan tondingku, ala so dapot ahu donganku, si Titus i, jala martinading hata nama ahu tu nasida, laho borhat tu Makedonia. [23†]

¹⁴Alai mauliate ma di Debata, na tongtong pamonang hami di bagasan Kristus, jala dipapatar do, di saluhut inganan marhite sian hami, parbinotoan taringot tu Ibana, na songon uap na hushus.

¹⁵Ai uap na hushus sian Kristus i do hami di adopan ni Debata, di angka na malua, nang di angka na laho mago. [24†]

¹⁶Uap hamatean tu hamatean di na deba; uap hangoluan tu hangoluan di na deba. Jala ise do na tau tusi? [25†]

¹⁷Ai ndada suman hami tu na deak i, na mangalansumhon hata ni Debata; alai sian lidang ni rohanami, sinuru ni Debata do huhatahon hami i di adopan ni Debata, di bagasan Kristus. [26†]