Read Batak Toba 2 KORINT 5 Bible Online

2 KORINT 5 - Batak Toba bible

2 KORINT 5

¹I. [1] Ai on do huboto hami: Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i. [54†]

²Ai saleleng dison, marhoi do hami huhut masihol, naeng haru solukkononhon inganannami na sian banua ginjang i. [55†]

³Ai nda tung songon na marsaemara hami tardapot disi, tung marabit do.

⁴Ai tagan di parlapelapean on hami, marhoi do hami jala sorat, ala dipangido rohanami: Naeng unang ma ditanggali sian hami, dilampishon ma nian, asa dibondut hangoluan i hamatean. [56†]

⁵Alai na patauhon hami tusi, Debata do i, dung jolo dilehon tu hami Tondi i, patujolona i. [57†]

⁶Asa na pos do rohanami tongtong, atik pe huboto hami, dao hami sian Tuhan i, saleleng maringanan di bagasan daging on hami. [58†]

⁷Ai di bagasan haporseaon do hami, ndada dope di bagasan na marnida, [59†]

⁸Alai lam pos do rohanami, jala lasan do bungkas sian daging on, laho maringanan di Tuhan i. [60†]

⁹Ala ni i huhut huringkoti hami, naeng halomoan ni rohana hami, manang naung sahat tu sambulo, manang di pardalanan dope. [61†]

¹⁰Ai ingkon gabe patar be do hita saluhutna sogot di jolo ni habangsa paruhuman ni Kristus, asa dijalo be hombar tu na niulana, tagan di pardagingon, manang na denggan, manang na roa. [62†] II.

¹¹Onpe, ala na binoto, habiaran do Tuhan i, huapoi hami do angka jolma i; alai patar do hami di Debata, jala hirim rohanami, patar do hami nang di bagasan rohamuna.

¹²Ndada mangulahi hami mamujimuji dirinami di jolomuna, alai mangalehon dalan tu hamu, asa adong pamujionmuna di hami maralohon dongan, angka na mangasahon rupa, alai ndada roha. [63†]

¹³Alai molo tung songon na so marroha hami, di Debata ma i; jala molo tung marroha hami, tu hamu do.

¹⁴Ai ditiop holong ni roha ni Kristus do hami.

¹⁵Jala songon on do hujujur hami: Anggo naung mate Nasada i humongkop sude, naung mate do nasida saluhutna. Jala humongkop saluhut do Ibana mate, asa unang be mangolu di dirina angka na mangolu i, asa mangolu nasida di Ibana, naung mate jala mulak mangolu humongkop nasida. [64†]

¹⁶Ala ni i, ndang hutanda hami be manang ise mangihuthon pardagingon; jala nang pe hutanda hami najolo Kristus mangihuthon pardagingonna, ndang be hutanda hami anggo nuaeng.

¹⁷Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru. [65†]

¹⁸Sudena i sian Debata do; ai Ibana do padengganhon hita tu dirina marhite Kristus, jala dilehon do tu hami tohonan pardengganan i. [66†]

¹⁹Ai di bagasan Kristus do Debata, gabe dipadenggan do portibi on tu dirina, ai ndang dijujur tu nasida dosanasida, jala dipajongjong do di tongatonganami hata pardengganan i. [67†]

²⁰Onpe, partonaan ni Kristus do hami, ai na mangapoi do Debata marhite sian hami. Singkat ni Kristus do hami mangelehelek: Sai olo ma hamu padengganon tu Debata! [68†]

²¹Ai on do dipatupa Debata: Humongkop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana. [69†]