Read Batak Toba 2 KORINT 6 Bible Online

2 KORINT 6 - Batak Toba bible

2 KORINT 6

¹I. [1] Na mangapoi do hami, angka dongan pangula, asa unang magopo panjaloonmuna di asi ni roha ni Debata. [70†]

²Ai didok do: “Di tingki parasian do ho hutangihon, jala di ari haluaon do ho huurupi. Nuaeng ma tongon tingki parasian; nuaeng ma ari haluaon i!” [71†]

³Ndang mangalehon partuktuhan hami di agia aha pe, asa unang hasurahan tohonannami.

⁴Di na saluhut hupatuduhon hami dirinami songon angka naposo ni Debata: Di bagasan habengeton godang, di bagasan angka haporsuhon, hasusaan dohot hagogotan; [72†]

⁵di na hona pungkul, di na tarhurung, di bagasan hagunturon, di halojaon, di mangkar ni mata, di parpuasaon; [73†]

⁶di bagasan hatomanon, di bagasan parbinotoan, lambas ni roha dohot habasaron, di bagasan Tondi Parbadia, di bagasan holong ni roha na so marpangansi; [74†]

⁷di bagasan hata hasintongan, di bagasan hagogoon ni Debata, marhitehite sinjata hatigoran di siamun dohot hambirang; [75†]

⁸mamolus sian hasangapon dohot haleaon, sian barita na roa dohot barita na denggan; songon angka na mangaliluhon, hape parsintong do;

⁹songon angka na so tinanda, hape na tinanda do; songon na naeng mate, hape na mangolu; songon angka na binunu, alai ndada na mate; [76†]

¹⁰songon angka na marsak, alai tongtong do parroha na las; songon angka na pogos, alai torop do dipamora; songon na so paradongan, hape saluhut do digomgom. [77†] II.

¹¹Buas do pandoknami tu hamu, halak Korint; ungkap do rohanami.

¹²Ndang mangingking rohanami maradophon hamu; rohamuna do na mangingking i.

¹³Songon na tu anakkonku ma hatangkon: Palambas hamu ma nang rohamuna, balos ni i! [78†]

¹⁴Unang saauga hamu dohot angka na so porsea! Ai aha ma pardomuan ni hatigoran dohot na so uhum; jala aha do hasaoran ni hatiuron dohot haholomon? [79†]

¹⁵Beha ma domu Kristus dohot Belial; aha ma hatopan ni na porsea dohot na so porsea?

¹⁶Tung olo ma mardomu joro ni Debata dohot angka ajiajian? Ai joro ni Debata na mangolu i do hita, songon na nidok ni Debata: “Naeng di tongatonganasida do Ahu maringanan jala mardalani, gabe Debatanasida do Ahu, jala nasida gabe bangsongku.” [80†]

¹⁷“Dibahen i, ruar ma hamu sian tongatonganasida jala paholang hamu ma dirimuna, ninna Tuhan i; unang ma jama hamu na ramun, asa hujangkon hamu!” [81†]

¹⁸“Jala gabe Ama ma Ahu di hamu, jala hamu gabe anak dohot boru di Ahu, ninna Tuhan, Sigomgom parluhutan.” [82†]