Read Batak Toba 2 KORINT 7 Bible Online

2 KORINT 7 - Batak Toba bible

2 KORINT 7

¹I. [1] Onpe, hamu angka haholongan, ala naung tu hita angka bagabaga ondeng, tapaias ma dirinta sian nasa na tau pahodarhon daging dohot tondi, laho patulushon habadiaon mardongan biar mida Debata!

²Jangkon hamu ma hami; ndang adong hujahati hami agia ise sian hamu, manang niago, manang niangatan pe. [83†]

³Ndang hudok i, laho mandabu uhum tu hamu; ai nunga hudok nangkin, naung di bagasan rohanami hamu, asa rap mate jala rap mangolu. [84†]

⁴Godang do hiras ni rohangku mida hamu, godang do nang pamujingku di hamu; naung tarapul situtu do rohangku, marlas ni roha na sumurung do ahu di bagasan saluhut haporsuhonnami.

⁵Ai nang di haroronami tu Makedonia, ndang marhasonangan dagingnami, sandok porsuk do huhilala hami: Paraloon sian duru, hatahuton sian bagasan. [85†]

⁶Alai Debata, na mangapul na toruk marroha. I ma mangapul nang hami, dibahen haroro ni si Titus. [86†]

⁷Ndada holan marhitehite harorona, dohot do marhitehite pangapulon, naung jinalona sian hamu, ai dibaritahon do tu hami sihol ni rohamuna, partangismuna dohot ringgasmuna humongkop ahu, gabe lam las do rohangku. II.

⁸Ai nang pe marsak hamu hubahen marhitehite surat i, ndang husolsoli rohangku disi. Tutu, husolsoli do najolo nian, ai huida marsak rohamuna satongkin, dibahen surat i. [87†]

⁹Anggo nuaeng, las do rohangku: Ndada ala naung marsak i rohamuna, ala ni hamubaon ni roha, na hinorhon ni arsak ni rohamuna, i do; ai sian Debata do arsak ni rohamuna, asa sandok unang luangan hamu hubahen hami.

¹⁰Ai dihorhon arsak ni roha na sian Debata do hamubaon ni roha tu haluaon, na so sisolsolan; alai dihorhon arsak ni roha ni portibi on do hamatean. [88†]

¹¹Tanda hamu ma arsak ni roha on, na sian Debata; ai dihorhon do di hamu ringgas ni roha na sai godang i, tole paraluson, sogo ni roha, hatahuton, sihol ni roha, pangkamuruhon, paminsangon pe. Di saluhutna i dipatuduhon hamu, paboa na lias hamu, di hata i.

¹²Asa hutongos pe surat i tu hamu, ndada ala ni parjahat i, manang ala ni na jinahatanna; ala ni on do tahe: Asa patar sama hamu, di adopan ni Debata ringgas ni rohamuna na humongkop hami.

¹³Ala ni i gabe tarapul hami. Alai dung tarapul hami, lam sumurung muse huhalashon hami las ni roha ni si Titus, ala dipahosa hamu saluhutna tondina i.

¹⁴Ai ndang tarila ahu, di na hupuji hamu maradophon ibana; sandok songon naung huhatahon hami saluhutna i tu hamu, mangihuthon hasintongan i, songon i do gabe marhasintongan pamujinami maradophon si Titus.

¹⁵Jala lam tu balgana do holong ni rohana di hamu, paingotingot pangoloionmuna saluhutna, ai dijangkon hamu do ibana mardongan biar dohot lomos ni roha. [89†]

¹⁶Na las do rohangku, ala haposan hamu hudapot di na saluhutna.