Read Batak Toba GALATIA 1 Bible Online

GALATIA 1 - Batak Toba bible

GALATIA 1

¹I. [1] Ahu surat ni si Paulus, apostel, ndada sian jolma, ndada marhite sian sada jolma, alai marhite sian Jesus Kristus jala marhite sian Debata Ama, naung pahehehon Ibana sian na mate; [1†]

²raphon dongan saluhut na mandongani ahu, mandapothon angka huria na di luat Galatia:

³Asi ni roha ma di hamu dohot dame sian Debata Ama dohot sian Tuhanta Jesus Kristus, [2†]

⁴naung mangalehon dirina ala ni dosanta, asa diroro hita sian hasiangan na jahat on, mangihuthon roha ni Debata Amanta. [3†]

⁵Di Ibana ma hasangapon ro di salelenglelengna i! Amen. II.

⁶Longang do rohangku, ala songon i tibu hamu marbalik sian Ibana, naung manjou hamu marhitehite asi ni roha ni Kristus, mangoloi barita na uli na asing.

⁷So manang adong na asing. On do tahe: Adong do halak na manggaori rohamuna, jala na pasambarhon barita na uli ni Kristus i. [4†]

⁸Alai aut sura hami, nang surusuruan sian banua ginjang pe, mamaritahon barita na uli, asing sian naung binaritahon tu hamu, hona toru ma ibana! [5†]

⁹Songon hatangku tu hamu najolo, tong songon i do nang nuaeng: Molo tung dibaritahon halak barita na uli tu hamu, asing sian naung jinalomuna i, hona toru ma ibana!

¹⁰Lomolomo ni jolma do hulului disi, manang lomo ni roha ni Debata? Na tabo di pinggol ni jolma do hulului? Aut i, ndang sintong ahu anak somang ni Kristus. [6†] III.

¹¹Alai hupabotohon ma tu hamu, angka dongan: Ndada mangihuthon hajolmaon barita na uli i na hubaritahon i.

¹²Ai ndada hujalo manang huguruhon i sian jolma, tung marhite sian pangungkapon ni Jesus Kristus, i do.

¹³Ai nunga dibege hamu pangalahongku, uju di bagasan hajahudion dope ahu: I ma na gasagasaon i ahu, mangalelei jala mangarotongkon huria ni Debata. [7†]

¹⁴Sumurung do ahu sian torop dongan torbangku di bangsongku mangulahon hajahudion, ai na tarlobi do pangkamuruhonku, mangaradoti tona na sian angka ompunami.

¹⁵Alai dipapulik Debata do ahu, andorang so topak dope ahu, jala dijou do ahu sian asi ni rohana. [8†]

¹⁶Gabe lomo rohana papatarhon Anakna i tu ahu, laho mamaritahon Ibana tu angka sipelebegu; ndang jolo huparguru disi sibuk dohot mudar. [9†]

¹⁷Jala ndada nangkok ahu tu Jerusalem, manopot angka apostel, naung jumolo sian ahu; alai tu tano Arab do ahu laho. Dung sian i, mulak ahu muse tu Damaskus.

¹⁸Jadi dung salpu tolu taon, nangkok ma ahu tu Jerusalem, laho mananda si Kepas, jala sampululima borngin ma ahu sorang di ibana. [10†]

¹⁹Alai ndang adong huida apostel na asing, dungkon ni si Jakobus, anggi ni Tuhan i. [11†]

²⁰Alai anggo taringot tu na husurat on tu hamu, tung di jolo ni Debata do i: Ndang margabus ahu!

²¹Dung i laho do ahu tu angka luat na di Siria dohot Kilikia. [12†]

²²Alai ndang ditanda huria ni Kristus, angka na di luat Judea i, anggo bohingku.

²³Holan na tarbege do tu nasida; na mangalele nasida najolo, i do mamaritahon nuaeng haporseaon, na nirotongkonna i najolo.

²⁴Jala dipuji nasida ma Debata ala ni ahu.