Read Batak Toba GALATIA 3 Bible Online

GALATIA 3 - Batak Toba bible

GALATIA 3

¹I. [1] Oe hamu, halak Galatia, na so marroha i! Ise do mandormai hamu? Ai nunga pola songon na ginombar diida matamuna Jesus Kristus na tarsilang i.

²Sasada on ma naeng botoonku sian hamu: Sian ulaon patik do dijalo hamu Tondi i, manang sian jamita haporseaon i?

³Songon i hape hami maoto! Di bagasan Tondi do pamungkaanna, gabe di bagasan daging ma pangujungina?

⁴Tung magopo ma panaononmuna na sai godang i (molo tung magopo)!

⁵Onpe, na patongon Tondi i tu hamu jala mangulahon angka hagogoon di bagasan hamu, na sian ulaon patik do diula i, manang sian jamita haporseaon i? II.

⁶Songon di si Abraham: “Dihaporseai do Debata, jadi i do dijujur tu ibana gabe hatigoranna!” [25†]

⁷Asa boto hamu ma: Angka na sian haporseaon, i do anak ni si Abraham.

⁸Alai diboto Surat i hian, na sian haporseaon i do pintoran ni Debata angka sipelebegu, gabe dibaritahon tu si Abraham: “Marhite sian ho pasupasuon saluhut bangso!” [26†]

⁹Onpe, angka na sian haporseaon i do dipasupasu rap dohot si Abraham na porsea i. [27†]

¹⁰Ai hona toru do saluhut na naeng marulaon patik, ai na tarsurat do: “Hona bura do ganup, na so mian di bagasan sasude na tarsurat di buku patik i, asa diulahon!” [28†]

¹¹Alai tandap do, na so adong dapotan hatigoran di jolo ni Debata, bahenon ni patik i; ai “na mangolu ma partigor i sian haporseaon!” [29†]

¹²Alai ndang sian haporseaon i anggo patik i; ai na mangulahonsa, i do na mangolu bahenon ni i! [30†]

¹³Ditobus Kristus i do hita sian bura ni patik i, di na hona bura Ibana humongkop hita, ai na tarsurat do: “Hona bura do ganup na targantung di hau!” [31†]

¹⁴Ai di bagasan Kristus Jesus naeng songgop tu halak sipelebegu pasupasu na tu si Abraham, asa marhitehite haporseaon tajalo Tondi na pinarbagabaga i.

¹⁵Ale angka dongan, adat ni hita jolma ma ginisanna: Padan testament ni jolma, dung gabe hot, ndang diose, ndang ditambai.

¹⁶Anggo angka bagabaga i dihatahon do tu si Abraham dohot tu pinomparna; ndada didok: Dohot tu angka pinomparna, songon tu na deak; tung tu na sada do: “Dohot tu pinomparmi”, ninna, i do Kristus. [32†]

¹⁷Lapatanna: Ia padan testament, naung pinahot ni Debata, ndang tarpasohot patik i, laho manundati bagabaga i; ai opat ratus tolupulu taon do i umpudi ro. [33†]

¹⁸Ai molo sian patik i uhum paneanon, ndang be sian bagabaga. Alai dibasabasahon Debata do i tu si Abraham dalan bagabaga. [34†] III.

¹⁹Tudia ma antong patik i? Ditambahon do i ala ni angka pangalaosion, paima ro Pomparan, Nampuna bagabaga i, jala marhitehite angka surusuruan i dipatongon tu tangan ni Pangulu. [35†]

²⁰Alai ndada na patureturehon sambariba ia pangulu; alai sada do anggo Debata.

²¹Asa mangalo angka bagabaga ni Debata do patik i? Dao ma anggo i! Ai aut dilehon patik na tuk pangoluhon, sian patik i ma tongon hatigoran i. [36†]

²²Alai dihinsu Surat i do saluhutna tubagasan dosa, asa dilehon bagabaga, na marhitehite haporseaon di Jesus Kristus, tu angka na porsea i. [37†]

²³Alai tagan so ro haporseaon, tarhurung do hita di bagasan patik jala dihinsu, managam haporseaon, na naeng patandahonon dope. [38†]

²⁴Asa gabe songon siparorot do patik i, mamboan hita tu Kristus, asa sian haporseaon hita dipintori.

²⁵Alai dung ro haporseaon i, ndang be ginomgoman ni siparorot i hita. [39†]

²⁶Ai saluhut do hamu anak ni Debata marhitehite haporseaon di Kristus Jesus. [40†]

²⁷Ai Kristus i do diparuloshon hamu, sude hamu, naung tardidi tubagasan Kristus. [41†]

²⁸Ndang mardiaimbar disi Jahudi manang Junani, hatoban manang anak mata, baoa manang parompuan, ai sada do hamu saluhutna di bagasan Kristus Jesus. [42†]

²⁹Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i. [43†]