Read Batak Toba GALATIA 4 Bible Online

GALATIA 4 - Batak Toba bible

GALATIA 4

¹I. [1] Alai on do hudok: Saleleng dakdanak dope panean i, ndang dia imbarna dohot anak somang, atik pe ibana nampuna sasudena i.

²Di gomgoman ni angka pangaramoti dohot juara bagas do ibana, ro di tingki naung hian binuhul ni amana i.

³Songon i nang di hita: Di hadakdanakonna i diparhatoban sisiasia ni hasiangan on do hita. [44†]

⁴Alai dung dapot gok ni tingkina, disuru Debata ma Anakna, tubu sian boruboru, ginomgoman ni patik i; [45†]

⁵asa ditobus angka na ginomgoman ni patik i, asa tajalo ruhut paramaon. [46†]

⁶Alai ala anak hamu, disuru Debata do tubagasan rohanta Tondi ni Anakna i, na manjoujou: Abba (ale Amang)! [47†]

⁷Dibahen i, ndang be hatoban ho; tung anak do! Alai molo anak, laos panean do ho marhite sian Debata! [48†]

⁸Alai di na so tinandamuna Debata, dipaolooloi hamu do angka na so Debata hian.

⁹Alai anggo nuaeng, ditanda hamu do Debata; nunga ditanda Debata hamu tahe. Marhua ma hamu marbalik muse, mulak tu sisiasia angka na so margellok jala na lea, asa oloanmuna angka i muse?

¹⁰Gabe siradoti ari, bulan, tingki dohot taon do hamuna. [49†]

¹¹Huholsohon do hamu, atik na so marniula halojaonki mangkongkop hamuna. [50†] II.

¹²Songon ahu ma hamu; ai ahu pe, songon hamu do, angka dongan! Elehelekhu di hamu; ndang adong dihahua hamu ahu. [51†]

¹³Alai diboto hamu do, di bagasan hagaleon ni daging huboan barita na uli tu hamu di mulana. [52†]

¹⁴Jala di na tarunjun i hamu dibahen pardagingonku, ndang na lea manang hu rohamuna disi; tung songon surusuruan ni Debata do dijangkon hamu ahu, songon Kristus Jesus, i do.

¹⁵Onpe, dia ma nuaeng na pinarhatuahonmuna i? Ai huhatindangkon do tu hamu, horukonmuna do uju i matamuna, mangalahonsa tu ahu, aut na tarbahen.

¹⁶Asa na gabe musumuna do ahu, ala huhatahon tu hamu hasintongan i? [53†]

¹⁷Ndada na polin ringgasnasida mangkongkop hamu. Alai naeng paduruonnasida hamu, anggiat ringgas rohamuna mangkongkop nasida. [54†]

¹⁸Denggan do sandok ringgas ni roha na polin, jala unang ma holan, jumpa di tongatongamuna ahu.

¹⁹Hamu angka anakkonku, angka na huae musengani, paima manjadi rupa ni Kristus di bagasan hamu: [55†]

²⁰Dipangido rohangku do, aut ma nian di tongatongamuna ahu tongon, jala tarpauneune ahu soarangki, ai na jut do rohangku pasarisari hamu.

²¹Hamu na giot gomgoman ni patik i, paboa hamu ma tu ahu: Ndang dibege hamu patik i? [56†]

²²Tarsurat do disi: Dua do anak ni si Abraham, na sada sian hatobanna, na sada nari sian boru mata i. [57†]

²³Alai mangihuthon sibuk do partubu ni na sian boru hatoban i, alai sian bagabaga i do na sian boru mata i. [58†]

²⁴Na marastuan do i: Ai padan na dua i do nasida: Na sada na sian dolok Sinai, na manjadihon parhatobanon, i ma si Hagar. [59†]

²⁵Ai di luat Arab do dolok Sinai, jala suman ma i tu Jerusalem nuaeng, ai na mangadop do i rap dohot anakkonna.

²⁶Alai Jerusalem na di ginjang i: I do boru mata i, jala i do ina di hita saluhutna! [60†]

²⁷Ai tarsurat do: “Marlas ni roha ma ho na hol, na so mangintubu, mariaia ma ho, marsoara na gogo, na so mangae anak; ai torop do anakkon ni na punjung i, tumorop asa na di na marhamulian.” [61†]

²⁸Alai anak bagabaga do anggo hamu, angka dongan, mangihuthon si Isak. [62†]

²⁹Alai tong do nuaeng songon na hian: Dilele na tubu marguru tu daging do na tubu marguru tu Tondi i. [63†]

³⁰Alai aha do didok Surat i? “Pabali ma boru hatoban i rap dohot anakna, ai na so tupa manean anak ni boru hatoban i rap dohot anak ni boru mata i!” [64†]

³¹Onpe, ale angka dongan, ndada anak ni boru hatoban hita, angka anak ni boru mata, i do! [65†]