Read Batak Toba EPESUS 1 Bible Online

EPESUS 1 - Batak Toba bible

EPESUS 1

¹I. [1] Ahu surat tinongos ni Paulus, apostel ni Kristus Jesus, sian lomo ni roha ni Debata, mandapothon angka na badia na di Epesus, angka na porsea di Kristus Jesus: [1†]

²Asi ni roha ma di hamu dohot dame sian Debata Amanta, nang sian Tuhan Jesus Kristus i! II.

³Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. [2†]

⁴Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanna i, di bagasan holong ni roha. [3†]

⁵Ditodo hian do hita bahen anakna, marhitehite Jesus Kristus, asa tu Ibana, mangihuthon halomoan ni rohana, [4†]

⁶asa tarpuji asi ni rohana na marmulia i, na niasihonna tu hita di bagasan na Hinaholonganna i. [5†]

⁷Di bagasan Ibana dapot hita haluaon i, binahen ni mudarna i, i ma hasesaan ni angka pangalaosion, mangihuthon asi ni rohana na tarlobi i, [6†]

⁸naung buas niusehonna i tu hita mardongan hapistaran dohot habisuhon godang.

⁹Ai dipabotohon Ibana do tu hita tahi ni rohana, na buni hian mangihuthon halolomona, naung pinahotna i di bagasan dirina, [7†]

¹⁰laho pasauthonsa di hagogok ni tingkina, mandok: Pasadahon di bagasan Kristus i sasudena, na di banua ginjang dohot na diatas tano on. [8†]

¹¹Ai di bagasan Ibana do dapotan partalian hita, angka naung tinodona hian, marguru tu tahi ni na patulushon sasude, mangihuthon pandok ni rohana, [9†]

¹²asa tarpuji hasangaponna marhitehite hita, angka naung mangkirim hian di Kristus i.

¹³Di bagasan Ibana dohot hamu umbege hata hasintongan i, i ma barita na uli na taringot tu haluaonmuna, jala di bagasan Ibana gabe porsea hamu, laos disahaphon do tu hamu Tondi Parbadia na pinarbagabaga i. [10†]

¹⁴Ibana do patujolo ni arta siteanonta, bahen haluaon ni na hinophopna i, asa tarpuji hasangaponna i. [11†] III.

¹⁵Asa ahu pe, dung hubege, naung porsea hamu di Tuhan Jesus jala holong rohamuna di saluhut angka na badia, [12†]

¹⁶ndang mansadi ahu mandok mauliate siala hamu, marningot hamu, di na martangiang ahu:

¹⁷Anggiat dilehon Debata ni Tuhanta Jesus Kristus, Ama ni hasangapon i, tu hamu Tondi hapistaran dohot pangungkapon mananda Ibana.

¹⁸Dipatiur ma mata ni rohamuna, asa diboto hamu rumang ni arta sihirimon sian panjouonna i ro di surung ni hasangapon, siteanon ni angka na badia i.

¹⁹Asa ditanda hamu nang hagogok ni gogona na sumurung i na tu hita, angka na porsea sian pangkorhon ni hagogoonna na marmulia i.

²⁰Ai di Kristus do i diulahon Debata, di na pinahehena i Ibana sian na mate jala pinahundulna i tu siamunna di bagasan banua ginjang i, [13†]

²¹tu ginjang ni nasa harajaon dohot huaso, nang hagogoon dohot hamuliaon, nang tu ginjang ni nasa goar na tarhatahon, ndada holan di hasiangan on, dohot do di na ro sogot. [14†]

²²Saluhutna do dipatunduk tutoru ni patna, jala dipabangkit do Ibana, na mangatasi sasude, gabe ulu ni huria i. [15†]

²³I do pamatangna na manggohi Ibana, asa gohanna sasude di bagasan saluhutna. [16†]