Read Batak Toba EPESUS 2 Bible Online

EPESUS 2 - Batak Toba bible

EPESUS 2

¹I. [1] Hamu pe, nunga mate hamu najolo hinorhon ni angka pangalaosion dohot dosamuna, [17†]

²angka na niulahonmuna marguru tu tingki ni hasiangan on, mangihuthon lomolomo ni na marhuaso di aoangaoang, i ma tondi na mangula nuaeng di bagasan angka anak na so siat hata. [18†]

³Raphon nasida do nang hita sasudena najolo mangulahon angka hisaphisap ni dagingta, di na taturut lomolomo ni daging i ro di sangkapsangkapna, jadi anak sirimasan do hita sian bangko hian, doshon angka na asing. [19†]

⁴Alai anggo Debata parasiroha bolon do jala parholongroha na balga maradophon hita.

⁵Jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu! [20†]

⁶Gabe rap dipangolu jala rap dipabangkit hita tu gomgoman banua ginjang, di bagasan Kristus Jesus. [21†]

⁷Laos patuduhononna do di angka tingki na naeng ro dope surung ni hamoraon ni asi ni rohana, di habasaonna i maradophon hita, di bagasan Kristus Jesus. [22†]

⁸Ai sian asi ni roha do, umbahen na malua hamu, dalan haporseaon; jala ndada binahenmuna, silehonlehon ni Debata do. [23†]

⁹Nda tung sian parulaon i, asa unang adong na mamuji diri. [24†]

¹⁰Ai jadijadianna do hita, angka na tinompa di bagasan Kristus Jesus, asa marulaon na denggan hita; ai angka i do dipature Debata hian, asa taparangehon i. [25†] II.

¹¹Dibahen i, hamu sipelebegu hian, na targoar na so parsunaton, digoar angka na somal didok parsunaton na pinatupa ni tangan di sibuk i; ingot hamu ma; [26†]

¹²Ndang parjambar di Kristus hamu uju i; dibalian ni harajaon Israel do hamu, jala ndang taruli di angka parpadanan bagabaga; soada sihirimon jala soada Debata di hamu di tano on. [27†]

¹³Alai anggo nuaeng, di bagasan Kristus Jesus do hamu; jala dao pe hamu najolo, gabe dipajonok mudar ni Kristus i do hamu nuaeng.

¹⁴Ai Ibana do pardameanta, dung dipasada na dua i jala ditangtangi dorpi parholangan i, i ma hamusuon i. [28†]

¹⁵Ai di bagasan dagingna do diloha Ibana patik i, i ma angka tona dohot aturan, asa ditompa di bagasan dirina na dua i, gabe sada jolma na imbaru, pajongjong dame. [29†]

¹⁶Jala dipadenggan do na dua i di bagasan daging na sasada i tu Debata, binahen ni silang i; ai disi do dipusa Ibana hamusuon i.

¹⁷Dung i ro ma Ibana, mamaritahon dame di hamu angka na dao, dame nang di angka na donok. [30†]

¹⁸Ai marhite Ibana adong do dalan manopot Ama i di hita na dua ragam i, di bagasan sada Tondi. [31†]

¹⁹Asa ndada be angka paisolat manang panginsua hamu; angka dongan saharajaon raphon angka na badia do, jala dongan sabagas ni Debata. [32†]

²⁰Ai dipauliuli do hamu diatas ojahan ni angka apostel dohot panurirang; Kristus Jesus sandiri do batu parsuhisuhi disi. [33†]

²¹Di bagasan Ibana do martomu sandok bagas i jala lam ganda, gabe joro na badia di bagasan Tuhan i.

²²Di bagasan Ibana do nang hamu rap dipauliuli, gabe parmianan ni Debata di bagasan Tondi i. [34†]