Read Batak Toba EPESUS 3 Bible Online

EPESUS 3 - Batak Toba bible

EPESUS 3

¹I. [1] Ala ni i do ahu, Paulus, niihot ni Kristus, ala hamu angka sipelebegu. [35†]

²Molo tung dibege hamu tohonan mangaradoti asi ni roha ni Debata, na pinasahatna i tu ahu, patureturehon hamu.

³Ai sian pangungkapon do dipabotohon tu ahu hahomion, na hutaringoti nangkiningan. [36†]

⁴Laho manjaha i, dapot timbangonmuna pangantusingku di hahomion ni Kristus i.

⁵Ndang dipabotohon dope i tu angka anak ni jolma di angka sundut najolo, alai nunga dipapatar i nuaeng tu angka apostelna na badia i dohot tu angka panurirangna, di bagasan Tondi i: [37†]

⁶Paboa, dohot do halak parbegu gabe dongan panean jala dongan sadaging dohot dongan satohap di bagabaga, na di bagasan Kristus Jesus, marhite sian barita na uli i. [38†]

⁷Naung gabe parhalado ni i do ahu, sian pangalehon ni Debata di asi ni rohana, na tu ahu sian pangkorhon ni hagogoonna i.

⁸Tu ahu, na ummetmet sian saluhut angka na badia i, dilehon asi ni roha on: Mamaritahon tu angka sipelebegu hamoraon ni Kristus na so hadodoan i; [39†]

⁹jala patorangkon pangalaho ni tohonan di hahomion i, na buni sian mula ni mulana di bagasan Debata, Sitompa saluhut. [40†]

¹⁰Naeng ma marhite sian huria i dipatandahon godang ni ragam ni hapistaran ni Debata tu angka na marmulia jala marhuaso di banua ginjang i. [41†]

¹¹I do ditahi sian mula ni mulana, gabe dipasaut di bagasan Kristus Jesus, Tuhanta i. [42†]

¹²Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana. [43†]

¹³Dibahen i mangido ahu, asa unang mandele hamu mida haporsuhonku, angka na humongkop hamu, ai hasangaponmuna do i. [44†] II.

¹⁴Ala ni i, hulompit do tothu maradophon Ama i.

¹⁵Ibana do haroroan ni nasa bangso, na targoar di banua ginjang nang di tano on.

¹⁶Anggiat, hombar tu godang ni hasangaponna i, dilehon tu hamu jolma parbagasan, sipargogoan jala sipatoguon marhitehite Tondina, [45†]

¹⁷asa maringanan Kristus i marhitehite haporseaon di bagasan rohamuna, gabe hot hamu marurat jala marojahan di bagasan roha na holong. [46†]

¹⁸Naeng ma malo hamu mangantusi, rap dohot saluhut angka na badia i, ganjangna dohot bidangna, bagasna dohot timbona,

¹⁹laho tumanda holong ni roha ni Kristus, na mangatasi nasa pangantusion, asa sahat tu hamu sandok hagogok ni Debata!

²⁰Alai tarpatupa Ibana do andul lumobi sian na tapangido manang tapingkiri, hombar tu hagogoon na mangkorhon di bagasan hita.

²¹Di Ibana ma hasangapon di tongatonga ni huria i jala di bagasan Kristus Jesus ro di saluhut sundut salelenglelengna! Amen.