Read Batak Toba EPESUS 4 Bible Online

EPESUS 4 - Batak Toba bible

EPESUS 4

¹I. [1] Asa ahu na tarihot di bagasan Tuhan i, huapoi ma hamu: Parangehon hamu ma na tama, hombar tu panjouon naung songgop tu hamu! [47†]

²Martoruk ni roha situtu, marlambok jala marlambas ni roha, masihaehean di bagasan roha na holong! [48†]

³Haringgashon hamu ma mangaradoti hasadaon ni Tondi, pinadomu ni dame!

⁴Ai sada do daging i, jala sada do Tondi; ai songon i do hamu tarjou di bagasan sada pangkirimon di panjouon i. [49†]

⁵Sada do Tuhan, sada do haporseaon, sada do nang pandidion. [50†]

⁶Sada do Debata, Ama ni sasude, sigomgomi saluhut, sitorusi saluhut jala siingani saluhut. [51†]

⁷Alai tu ganup hita be do dibasabasahon asiasi i, marguru tu panagihon ni pangalehon ni Kristus. [52†]

⁸Dibahen i ninna do: “Nunga manaek Ibana tu ginjang, ditaban do na tarhurung; dilehon do silehonlehon tu angka jolma!” [53†]

⁹Alai nangkok pe Ibana, naung tuat do Ibana jumolo tu inganan na ditoru ni tano. [54†]

¹⁰Ibana, naung tuat i, laos I do na manaek tu ginjang ni saluhut banua ginjang, asa digohi sasude.

¹¹Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari, [55†]

¹²patureturehon angka na badia i, laho mangulahon tohonan i, pauliulihon daging ni Kristus: [56†]

¹³Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus.

¹⁴Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon. [57†]

¹⁵Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus. [58†]

¹⁶Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i. [59†] II.

¹⁷Asa on do na hudok jala huhatindangkon marhitehite Tuhan: Na so tupa be hamu marpangalaho songon halak sipelebegu, na marrohahon na so marguna. [60†]

¹⁸Angka parroha haholomon do nasida, angka na holang sian ngolu ni Debata, binahen ni haotoon ni rohanasida, ala naung gabe pir rohanasida. [61†]

¹⁹Ndang marnangon nasida, gabe dipasahat dirina tu pargadombuson, jala diulahon nasa harorangon mardongan pangahution.

²⁰Alai anggo hamu, ndang songon i diguruhon hamu Kristus i,

²¹namun dibege hamu baritana jala dapotan poda sian Ibana, i ma hasintongan di bagasan Jesus: [62†]

²²Tanggali hamu ma jolma na buruk i, isara di pangalaho najolo, ai laho mago do i hinorhon ni angka hisaphisap sipaotooto. [63†]

²³Alai paimbaru hamu ma dirimuna di bagasan tondi ni rohamuna! [64†]

²⁴Jala solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan! [65†]

²⁵Dibahen i, bolongkon hamu gabus i; hatahon hamu ma na sintong, ganup tu donganna, ai ruas do hita sama hita. [66†]

²⁶Ia tarrimas hamu, unang ma mardosa! Unang ma sanga mate mata ni ari, so mintop rimasmuna. [67†]

²⁷Unang pasiat hamu sibolis i!

²⁸Naung manangko i, unang be manangko; mulaulaon ma ibana, tanganna i ma sumarihon ngoluna, asa adong lehononna tu na hurangan. [68†]

²⁹Unang ma ruar hata na busuk sian pamanganmuna; naeng ma na denggan na tau padengganhon na humurang, asa dapotan uli na umbegesa. [69†]

³⁰Jala unang ma arsahi hamu Tondi Parbadia ni Debata, naung disahaphon tu hamu tu ari haluaon i. [70†]

³¹Dao ma sian hamu nasa riting ni roha dohot muruk dohot rimas, nang hata songgaksonggak dohot insahinsak, songon i nasa hajahaton! [71†]

³²Alai gabe na basar ma hamu sama hamu, angka parasiroha; masisesaan dosa ma hamu, songon panesa ni Debata di dosamuna di bagasan Kristus. [72†]