Read Batak Toba EPESUS 5 Bible Online

EPESUS 5 - Batak Toba bible

EPESUS 5

¹I. [1] Onpe, sitiru Debata ma hamu, songon angka anak na hinaholongan! [73†]

²Jala parangehon hamu ma haholongon i songon Kristus i, na mangkaholongi hamu jala dilehon do dirina humongkop hita, gabe silua jala pelean bahen uap na hushus tu Debata. [74†]

³Alai parmainanon dohot ragam ni harorangon ro di pangahution, unang ma targoar di hamu; ai songon i do tama di angka na badia. [75†]

⁴Songon i nasa sihailahononhon, hata barangsi dohot pargaitgaiton na so patut; alai mauliate ma nian dohonon. [76†]

⁵Ai boto jala ingot hamu ma: Anggo di harajaon ni Kristus dohot Debata, ndang adong siteanon ni parmainan manang parhodar, manang parroha na ahut; ai sioloi na so Debata do i. [77†]

⁶Unang olo hamu paotootoon ni hatahata na rumar; ai ala ni angka i do mangonai rimas ni Debata tu angka anak na so mangoloi.

⁷Dibahen i, unang ma hamu gabe dongan satohapnasida!

⁸Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron! [78†]

⁹Ai nasa habasaon dohot hatigoran dohot hasintongan, i do parbue ni na tiur i. [79†]

¹⁰Tangkasi hamu ma, manang dia lomo ni roha ni Tuhan i! [80†]

¹¹Unang ma saor hamu tu angka ulaon haholomon na soada parbuena; pinsangi hamu angka i tagonan!

¹²Ai gari manaringoti na niulanasida di na buni, gari hailaon do. [81†]

¹³Alai gabe patar do i saluhutna, tinoruan ni na tiur i; ai nasa naung dipapatar, tiur ma i! [82†]

¹⁴Dibahen i, ninna do: “Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho!” [83†]

¹⁵Antong, manat ma hamu mamereng manangkasi parulaonmuna; songon angka na marroha, unang ma songon angka na hurang roha! [84†]

¹⁶Parhaseang hamu ma tingki, ai ari hasusaan do nuaeng. [85†]

¹⁷Dibahen i, unang ma gabe maoto hamu; alai antusi hamu ma, manang dia lomo ni roha ni Tuhan i. [86†]

¹⁸Unang ma mabuk hamu bahenon ni anggur, ai hamagoan do di bagasan i; alai gok Tondi ma hamu! [87†]

¹⁹Hatahon hamu ma sama hamu angka ende psalmen, angka ende pujipujian dohot ende partondion; endehon jala puji hamu ma Tuhan i di bagasan rohamuna! [88†]

²⁰Manongtong ma hamu mandok mauliate siala saluhutna tu Debata Ama, di bagasan Goar ni Tuhanta Jesus Kristus! II.

²¹Masioloan ma hamu sian biar ni rohamuna mida Kristus! [89†]

²²Dioloi angka parompuan ma baoana be, songon pangoloi di Tuhan! [90†]

²³Ai baoa i do ulu ni pardihutana, songon Kristus ulu ni huria i; laos Sipangolu daging i do Ibana. [91†]

²⁴Alai songon pangoloion ni huria di Kristus i, songon i ma angka parompuan maradophon baoana be di na saluhutna.

²⁵Hamu angka baoa, haholongi hamu ma pardihutamuna be songon Kristus, na mangkaholongi huria i jala dilehon do dirina humongkopsa; [92†]

²⁶asa diparbadiai, dung diiasi marhitehite na mandidihon aek di bagasan Hata i. [93†]

²⁷Jala sangap do dipadiri di Ibana huria i, so marlindang, so marhalingking, manang marhahurangan dia pe, asa badia tahe jala so hasurahan. [94†]

²⁸Songon i do patut haholongan ni angka baoa pardihutana be, songon dagingna sandiri. Na mangkaholongi pardihutana, dirina do hinaholonganna disi.

²⁹Ndang dung dihosomi jolma dagingna, diparmudumudu do jala dipainuinu, songon pambahen ni Kristus tu huria i.

³⁰Ai ruas ni dagingna do hita. [95†]

³¹“Ala ni i, tadingkonon ni halak do amana dohot inana, mangangkupi dongan saripena; jala gabe sada daging do nasida na dua i!” [96†]

³²Tung na balga do hahomion on; alai tu Kristus dohot tu huria i huhonahon.

³³Alai sandok ganup hamu, masihaholongi pardihutana be songon dirina; alai dihabiari parompuan i ma baoana!