Read Batak Toba EPESUS 6 Bible Online

EPESUS 6 - Batak Toba bible

EPESUS 6

¹I. [1] Hamu angka anak, oloi hamu ma angka natuatuamuna di bagasan Tuhan i; ai i do na tigor. [97†]

²“Parsangapi amangmu dohot inangmu!” I do patik na parjolo mardongan bagabaga: [98†]

³“Asa martua ho jala leleng mangolu di tano on!” [99†]

⁴Hamu angka ama, unang gintali hamu angka anakkonmuna; pagodanggodang hamu ma nasida di bagasan ajar dohot poda ni Tuhan i! [100†]

⁵Hamu angka anak somang, oloi hamu ma angka indukmuna di hasiangan on mardongan biar dohot lomos ni roha; marroha na bulus songon na maradophon Kristus! [101†]

⁶Unang hamu pangoloi di mata, songon na mambuat roha ni jolma; songon naposo ni Kristus ma ulahon hamu roha ni Debata, sian nasa rohamuna.

⁷Sian burjumuna ma hamu mangoloi: Songon di Tuhan i, unang di jolma i!

⁸Ai diboto hamu do: Sumuang jaloon ni ganup sian Tuhan i na denggan na niulana, manang hatoban ibana manang anak mata. [102†]

⁹Hamu angka induk pe, laos songon i ma bahen hamu tu nasida; antahi hamu ma na mangasupi i, ai diboto hamu do, di banua ginjang do nang Tuhanmuna, jala ndada siida bohi Ibana. [103†] II.

¹⁰Dungkon ni i, gabe togu ma rohamuna di bagasan Tuhan i dohot di bagasan hagogoonna na togu i! [104†]

¹¹Solukkon hamu ma pangkean sinjata na sian Debata, asa taralo hamu utiutian ni sibolis i. [105†]

¹²Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i. [106†]

¹³Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude.

¹⁴Antong, jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i. [107†]

¹⁵Marsipatu ma patmuna, laho mangkaringgashon barita na uli, pardamean i. [108†]

¹⁶Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. [109†]

¹⁷Jangkon hamu ma nang tahuluk haluaon dohot podang ni tondi, i ma hata ni Debata. [110†]

¹⁸Martangiang ma hamu, mardongan sandok pangidoan dohot elehelek di bagasan Tondi, manang sadihari pe, huhut dungo jala jugul tongtong, tumangiangkon saluhut angka na badia, [111†]

¹⁹nang ahu pe, asa dibungka pamanganku, mandok sidohononku, laho pabotohon hahomion ni barita na uli, mardongan hiras ni roha. [112†]

²⁰Ai tusi do disuru ahu na tarrante on, asa marhiras ni roha ahu disi, mangkatahonsa songon na tama. [113†] III.

²¹Alai paboaon ni si Tikikus do tu hamu saluhutna i, asa diboto hamu na masa di ahu, ro di ulaonku; ai ibana do dongan na hinaholongan jala parhobas haposan di bagasan Tuhan i. [114†]

²²Ala ni i do husuru ibana mandapothon hamu, asa dapot botoonmuna na masa di hami, jala asa diapuli rohamuna.

²³Dame ma di angka dongan, dohot holong ni roha raphon haporseaon sian Debata Ama i, nang sian Tuhan Jesus Kristus i! [115†]

²⁴Asi ni roha i ma mandongani saluhut, angka na marsihohot mangkaholongi Tuhanta Jesus Kristus!