Read Batak Toba PILIPPI 2 Bible Online

PILIPPI 2 - Batak Toba bible

PILIPPI 2

¹I. [1] Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha,

²gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!

³Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! [18†]

⁴Unang ma na ringkot di hamu be matahon hamu, dohot ma na di dongan! [19†]

⁵Songon parrohaon ni Kristus Jesus ma parrohaonmuna!

⁶Atik pe rupa ni Debata di Ibana, ndada songon na nidobo dirajumi rohana tudosna i tu Debata. [20†]

⁷Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. [21†]

⁸Dipatutoru do dirina; na gabe pangoloi do Ibana paima mate, pola tung mate tarsilang! [22†]

⁹Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, [23†]

¹⁰asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, [24†]

¹¹jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! II.

¹²Onpe, hamu, na hinaholongan, songon tongtong ni pangoloionmuna nasailaon, unang holan jumpa di hamuna ahu, lam songon i ma, di na padaodao ahu: Mardongan biar dohot lomos ni roha ulahon hamu ma haluaonmuna! [25†]

¹³Ai diula Debata do di bagasan hamu giot ni roha nang ulaon saut, mangihuthon lomo ni rohana. [26†]

¹⁴Di nasa pambahenanmuna: Unang ma hamu marungutungut, unang ma marroha ganggu! [27†]

¹⁵Naeng ma so hasurahan jala so marlaok hamu, angka anak ni Debata, angka na so marlindang di tongatonga ni sundut na geduk jala na marbalik; disi ma hamu marsinondang songon sisondangi portibi on! [28†]

¹⁶Marsitiopan ma hamu tu hata hangoluan i, bahen pujipujian di ahu di ari ni Kristus, paboa na so magopo parlojongonku, jala ndada na so marguna halojaonku. [29†]

¹⁷Ai nang pe didurushon mudarhu songon pelean mangkongkop haporseaonmuna, marlas ni roha do ahu rap dohot hamu saluhutna. [30†]

¹⁸Laos i ma halashon hamu, jala marlas ni roha ma hamu rap dohot ahu! [31†] III.

¹⁹Alai hirim do rohangku marhitehite Tuhan Jesus, tibu ma suruonku si Timoteus manopot hamu, anggiat marhiras ni roha nang ahu, anggo dung huboto na masa di hamu.

²⁰Ai ndang adong be donganku sisaroha, na olo sumarihon hamu sian roha na burju. [32†]

²¹Ai na ringkot tu dirina be do dijalahi ndada na tu Kristus Jesus i. [33†]

²²Alai diboto hamu do hatauonna i, ai songon anak tu amana pangkobasionna di ahu, humongkop barita na uli i.

²³Hirim do rohangku, tarsuru ahu do ibana, disi huboto, manang beha langkangku.

²⁴Alai pos do rohangku di bagasan Tuhan i, tibu ma nang ahu ro. [34†]

²⁵Alai ninna rohangku do, patut suruonku manopot hamu dongan i, si Epaproditus, donganku mangula jala marungkil, na sinurumuna mamboan na ringkot di ahu. [35†]

²⁶Ai masihol do ibana mida hamu saluhutna, jala humasusa rohana, ala tarbortik tu hamu sahitna i.

²⁷Jala tutu do ibana marsahit, pola mate ne: Alai asi do roha ni Debata mida ibana, ndada holan di ibana tahe, tung na dohot do di ahu, unang mardapotdapot arsak ni rohangku.

²⁸Muba ma antong ringkot ni rohangku marsuru ibana, asa marlas ni roha hamu marnida ibana, palumbang nang rohangku huhut.

²⁹Onpe, marlas ni roha situtu ma jangkon hamu ibana di bagasan Tuhan i, jala parhamaol hamu ma angka na songon i! [36†]

³⁰Ai humongkop ulaon ni Kristus i sor mate ibana, jala diseahon do hosana, laho manggohi na hurang dope sian hamu, mangkobasi di ahu.