Read Batak Toba KOLOSSE 1 Bible Online

KOLOSSE 1 - Batak Toba bible

KOLOSSE 1

¹I. [1] Ahu surat ni si Paulus, apostel ni Kristus Jesus, sian lomo ni roha ni Debata, dohot Timoteus, dongan i,

²mandapothon angka na badia na di Kolosse, angka dongan na porsea, na di bagasan Kristus: Asi ni roha ma di hamu dohot dame sian Debata, Amanta i! [1†] II.

³Mandok mauliate do hami, laho tumangiangkon hamu tongtong tu Debata, Ama ni Tuhanta Jesus Kristus.

⁴Ai hubege hami do barita ni haporseaonmuna di Kristus Jesus, nang holong ni rohamuna mida saluhut na badia, [2†]

⁵ala ni sihirimon i, naung diparade di hamu di banua ginjang i; nunga dibege hamu hian i marhitehite hata hasintongan i, i ma barita na uli i.

⁶I ma naung sahat, nang tu hamu, nang tu liat portibi on; na marparbue do i jala lam ganda, suang songon na di hamu, olat ni dung dibege jala ditanda hamu asi ni roha ni Debata di bagasan hasintongan.

⁷Songon i do diguruhon hamu sian si Epapras, dongan saulaon i, na hinaholongan; ai parhalado ni Kristus na haposan do ibana humongkop hamu. [3†]

⁸Laos ibana do pajojorhon tu hami holong ni rohamuna di bagasan tondi.

⁹Dibahen i, dung hubege hami i, ndang mansohot nang hami tumangiangkon hamu, jala mangido, asa digohi di hamu pantas ni roha, mananda lomo ni rohana, marhitehite nasa hapistaran dohot habisuhon partondion, [4†]

¹⁰asa marparange na tama di Tuhan i hamu, gabe halomoan situtu jala marparbuehon nasa ulaon na denggan; [5†]

¹¹laos ganda di hamu panandaon di Debata, gabe margogo situtu hamu hombar tu gogo ni hasangaponna i, mangkorhon nasa habengeton dohot lambas ni roha, mardongan las ni roha. [6†]

¹²Mandok mauliate ma hamu di Ama i, naung patauhon hamu, manjalo tohap na di bagasan hatiuron i, siteanon ni angka na badia i! [7†]

¹³Ai nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohana. [8†]

¹⁴Di bagasan Ibana do adong di hita haluaon i, i ma hasesaan ni angka dosa. [9†] III.

¹⁵Ibana do suman ni Debata na so tarida i; na parjolo tubu sian nasa na tinompa. [10†]

¹⁶Ai marhite sian Ibana do ditompa saluhutna, na di banua ginjang dohot na di tano on, na tarida dohot na so tarida i, angka habangsa, angka harajaon, angka gomgoman, angka parhuasoon; saluhutna i do ditompa marhitehite Ibana, jala marhapatean tu Ibana. [11†]

¹⁷Jala di jolo ni saluhutna do Ibana, jala saluhutna i do hot di bagasan Ibana. [12†]

¹⁸Ibana do ulu ni daging i, i ma huria i. Ibana do parmulaan, naung parjolo tubu sian angka na mate, asa Ibana parjolo di na saluhutna. [13†]

¹⁹Ai ditontuhon Debata do, naeng ma maringanan di bagasan Ibana sandok hagogokna i! [14†]

²⁰Laos marhite sian Ibana do padengganonna tu dirina saluhutna i, nang angka na di tano, nang angka na di banua ginjang, dung dipatupa dame marhitehite mudar na sian silangna i, marhitehite Ibana. [15†]

²¹Dohot do hamu, angka na holang najolo jala parroha musu marhitehite angka ulaon hajahaton, [16†]

²²dipadenggan Ibana nuaeng marhitehite daging hajolmaonna i, di na mate i Ibana, laho pajongjongkon hamu badia jala so hasurahan jala so sipinsangon, maradophon Ibana. [17†]

²³Asal ma mian hamu ojak jala hot di bagasan haporseaon, jala so olo meret sian pangkirimon, na binegemuna di barita na uli, na binaritahon tu saluhut na tinompa, na ditoru ni langit Ahu, Paulus, gabe parhalado ni i.

²⁴Las do rohangku nuaeng di angka haporsuhonku na humongkop hamu, jala marhite sian dagingku hugoki na hurang dope di angka na tinaon ni Kristus, humongkop dagingna, i ma huria i. [18†]

²⁵Naung gabe parhalado ni i do ahu, hombar tu pangaradotion ni Debata, na pinasahatna tu ahu, i ma na manggohi hata ni Debata nang di hamu.

²⁶I ma hahomion, na buni najolo sian mula ni mulana, marsundutsundut; alai nuaeng dipapatar do tu angka na badiana. [19†]

²⁷Ai tu nasida do naeng pabotohonon ni Debata surung ni hamuliaon ni hahomion on, di tongatonga ni angka parbegu; i ma: Kristus di bagasan hamu, sihorhon pangkirimon di hasangapon. [20†]

²⁸Ibana do hubaritahon hami; hupaingot jala huajari hami nasa jolma di nasa habisuhon, laho pajongjong ganup jolma rimpas di bagasan Kristus. [21†]

²⁹I do huhalojahon mardongan parungkilon, marguru tu hagogoonna, na gogo situtu mangkorhon di bagasan ahu.