Read Batak Toba 1 TESSALONIK 1 Bible Online

1 TESSALONIK 1 - Batak Toba bible

1 TESSALONIK 1

¹Ahu surat tinongos ni si Paulus, si Silwanus dohot Timoteus mandapothon huria Tessalonik na di bagasan Debata Ama dohot Tuhan Jesus Kristus: Asi ni roha ma di hamu dohot dame! [1†]

²Na mandok mauliate do hami tongtong tu Debata siala hamu saluhutna; ai hutaringoti hami do hamu di tangiangnami.

³Ai ndang mansadi hami marningot ulaonmuna na sian haporseaon dohot halojaonmuna na sian holong ni roha i ro di habengetonmuna na sian roha na mangkirim di Tuhanta Jesus kristus, i ma maradophon Debata Amanta. [2†]

⁴Ai huboto hami do, ale angka dongan na hinaholongan ni Debata: Angka naung tarpillit do hamu. [3†]

⁵Ai ndada marhitehite hata sambing ro barita na uli, na hupaboa hami tu hamu, tung mardongan hagogoon do dohot Tondi Parbadia, angkup ni hiras ni roha godang; ai diboto hamu do antong pangalaho ni hami na ro i tu hamu humongkop hamu. [4†]

⁶Jadi nunga gabe paniru hamu di hami dohot di Tuhan i, ai marlas ni roha na sian Tondi Parbadia do hamu manjalo hata i di bagasan haporsuhon godang. [5†]

⁷Pola gabe sitiruon hamu di saluhut dongan na porsea, angka na di luat Makedonia dohot Akaya. [6†]

⁸Ai sian hamu do marlupuk hata ni Tuhan i, ndada holan tu luat Makedonia dohot Akaya; tung tu saluhut luat do tarbarita haporseaonmuna di Debata, asa ndang pola be taringotannami anggo i. [7†]

⁹Ai dibaritahon nasida do nang dalannami masuk tu hamu, nang dalanmuna mulak tu Debata, tumadingkon angka ajiajian laho mangoloi Debata na mangolu jala na sintong i. [8†]

¹⁰Na maimaima nama hamu di haroro ni Anakna sian banua ginjang i, dung dipahehe sian angka na mate, i ma Jesus, na paluahon hita sian rimas na naeng ro i. [9†]