Read Batak Toba 1 TESSALONIK 3 Bible Online

1 TESSALONIK 3 - Batak Toba bible

1 TESSALONIK 3

¹Ala na so tartaon hami be siholnami, denggan do di rohanami, holan hami ma jolo tading di huta Aten. [22†]

²Gabe husuru hami ma si Timoteus, angginami jala naposo ni Debata, mangkobasihon barita na uli na sian Kristus, asa dipatogu rohamuna jala dipodai hamu marhaporseaon; [23†]

³asa unang diunggilhon angka haporsuhon i na deba sian hamu; ai diboto hamu do, tusi do hita dipadiri. [24†]

⁴Ai di tongatongamuna dope hami, nunga hulumbahon hami hian tu hamu, na naeng masa angka haporsuhon tu hita, songon naung masa tutu patar di jolomuna.

⁵Dibahen i ndang tartaon ahu be, gabe husuru na manangkasi haporseaonmuna, atik beha naung diunjuni sipangunjuni i hamu, gabe magopo maon na huhalojahon hami. [25†]

⁶Alai dung mulak si Timoteus tu hami sian hamu, denggan do dibaritahon tu hami haporseaonmuna dohot holong ni rohamuna angkup ni i dibaritahon do burjumuna marningot hami dohot sihol ni rohamuna, naeng idaonmuna hami, songon hami na masihol di hamu. [26†]

⁷Disi ma tarapul hami marningot hamu, ale angka dongan, dibahen haporseaonmuna, nang pe didondoni ragam ni hagogotan dohot haporsuhon hami.

⁸Ai na mangolu ma hami nuaeng, anggo hot hamu jongjong marojahan di Tuhan i.

⁹Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu?

¹⁰Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna.

¹¹Alai Debata Amanta sandiri dohot Tuhanta Jesus ma pabulushon langkanami tu hamu!

¹²Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu!

¹³Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiana. [27†]