Read Batak Toba 1 TESSALONIK 4 Bible Online

1 TESSALONIK 4 - Batak Toba bible

1 TESSALONIK 4

¹I. [1] Angkup ni i, ale angka dongan, huelehelek jala huapoi hami ma hamu marhitehite Tuhan Jesus: Lam tang ma hamu marguru tu poda na jinalomuna sian hami taringot tu parange na tama, laho pasauthon lomo ni roha ni Debata, songon naung binahenmuna.

²Ai diboto hamu do patik angka na hulehon hami tu hamu marhitehite Tuhan Jesus.

³On do pinangido ni roha ni Debata: Naeng badia hamu; harorangon i naeng pasidingonmuna.

⁴Naeng ma ganup hamu umboto mardongan saripe di bagasan habadiaon na tama. [28†]

⁵Unang ma mangihuthon hisaphisap na garang i, songon halak sipelebegu na so tumanda Debata.

⁶Ndang jadi jahatan manang angatan dongan di pandaraman; ai parlulu do Tuhan i di sasudena i, songon naung hulumbahon jala huhatindangkon hami tu hamu.

⁷Ai tu habadiaon do dijou Debata hita, ndada tu hahodaron.

⁸Dibahen i, molo hu roha ni halak disi, ndada jolma nileaanna, sandok Debata do, naung mangalehon Tondina na badia i tubagasan hamu. [29†]

⁹Alai anggo haholongon ni roha di dongan, ndang haru ringkot pasingothononku tu hamu, ai nunga diajari Debata hamu masihaholongan. [30†]

¹⁰Laos songon i do diula hamu tu saluhut dongan na di liat Makedonia. Alai huapoi hami do hamu, ale angka dongan, naeng ma lam sumurung hamu!

¹¹Jala haringkothon hamu ma, asa parhohom hamu masiradoti tohapna, angkup ni i marulaon ma dohot tanganmuna, songon naung hurodihon hami. [31†]

¹²Anggiat maradat hamu idaon ni angka na di balian, unang pola marbagahon sian halak. [32†] II.

¹³Alai naeng ma tangkas botoonmuna, ale angka dongan, taringot tu angka naung monding i, asa unang marsak hamu, songon angka na leban, na so marpangkirimon. [33†]

¹⁴Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding marhitehite Ibana. [34†]

¹⁵Ai hata ni Tuhan i do na hupasahat hami nuaeng tu hamu: Ia mangolu pe hita, angka na mian ro di haroro ni Tuhan i, nda tung sumurung hita sian nasida naung monding i. [35†]

¹⁶Ai na tuat ma Tuhan i sian banua ginjang mardongan suraksurak, marsoara ma raja ni surusuruan, tarbege ma sarune ni Debata. Dung i hehe ma jumolo angka na mate di bagasan Kristus. [36†]

¹⁷Dung songon i, hita na mangolu dope, angka na mian i, taitonna ma hita raphon nasida di bagasan angka ombun, laho manomunomu Tuhan i tu langit an; jadi olat ni i sai tongtong ma hita rap dohot Tuhan i. [37†]

¹⁸Antong, masiapulan ma hamu marhitehite angka hata i!