Read Batak Toba JOSUA 1 Bible Online

JOSUA 1 - Batak Toba bible

JOSUA 1

¹I. [1] Jadi dung mate si Musa, naposo ni Jahowa, ninna Jahowa ma tu si Josua, anak ni si Nun, parhalado ni si Musa, songon on:

²Nunga mate ianggo si Musa, naposongki, on pe borhat ma ho, taripari ma Jordan on, ho dohot sandok bangso on laho tu tano silehononku tu nasida, tu halak Israel i. [1†]

³Sude tano, sidalanan ni palak ni patmuna, nunga hulehon tu hamu, songon na hudok tu si Musa hian. [2†]

⁴Olat ni halongonan dohot Libanon sahat ro di batang aek na bolon, i ma batang aek Euprat, sandok tano ni halak Het, jala sahat ro di laut na bolon tungkan hasundutan, i ma parbalohanmuna.

⁵Ndang adong manang ise na manahan jongjong di jolom saleleng ho mangolu, songon pandonganingku di si Musa, dongananku ho; ndang tagamon pasombuonku manang tadingkononku ho. [3†]

⁶Pir ma tondim jala marsihohot, ai ingkon ho do marbagi tano on bahen partalian ni bangso on, na huuarihon tu ompunasida, lehononku tu nasida. [4†]

⁷Asal pir tondim, jala marsihohot situtu mangaradoti dohot patupahon hombar tu sude patik, angka na tinonahon ni si Musa, naposongki tu ho. Unang manimbil ho sian i tu siamun manang tu hambirang, asa marmulia ho manang dompak dia ho mangalangka. [5†]

⁸Unang meret buku ni patikon sian pamanganmu, sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i, asa maruntung ho di angka dalanmu, jala marmulia parulaonmu. [6†]

⁹Nda nunga hudok tu ho: Pir ma tondim, jala marsihohot? Unang manonditnondit roham, jala unang tahuton, ai Jahowa Debatam do donganmu, manang dompak dia pe ho mangalangka. II.

¹⁰Jadi ditonai si Josua ma angka partogi ni bangso i, songon on:

¹¹Bolus hamu ma tongatonga ni parsaroan i, jala dok hamu ma tu bangso i, songon on: Padiri hamu ma bohalmuna, ai di bagasan tolu ari on dope tariparanmuna ma Jordan on, asa bongot jala teanonmuna tano silehonon ni Jahowa, Debatamuna tu hamu, bahen partalianmuna.

¹²Jala tu halak Ruben, Gad dohot satonga marga Manasse, didok si Josua songon on:

¹³Ingot hamu ma hata na tinonahon ni si Musa, naposo ni Jahowa, tu hamu di na nidokna i: Nunga sonang hamu dibahen Jahowa Debatamuna, jala dilehon tu hamu tano on. [7†]

¹⁴Ianggo jolmamuna, anakkonmuna dohot pinahanmuna, itenang tading di tano na nilehon ni si Musa tu hamu, di bariba ni Jordan; alai anggo hamu, ingkon marsinjata be hamu, nasa sialo musu manguluhon donganmuna taripar mangurupi nasida.

¹⁵Paima dipasonang Jahowa donganmuna, suang songon hamu, jala dohot nasida mangingani tano silehonon ni Jahowa Debatamuna, tu nasida. Dung i mulak ma hamu tu tano partalianmuna, asa hamu nampunasa na nilehon ni si Musa, naposo ni Jahowa tu hamu, di bariba ni Jordan tungkan habinsaran.

¹⁶Jadi didok nasida ma mangalusi si Josua: Sude na tinonahonmu tu hami bahenonnami ma, jala manang tudia pe hami disuru ho, topotonnami do.

¹⁷Sandok songon panangihonnami di si Musa, songon i do tangihononnami ho; asal didongani Jahowa Debatam ho, songon na nidongananna si Musa.

¹⁸Manang ise na mangalo parentam, jala ndang ditangihon angka hatam, taringot tu sude na tinonahonmu tu hami, ingkon marutang hosa ibana; asal pir tondim jala marsihohot. [8†]