Read Batak Toba JOSUA 13 Bible Online

JOSUA 13 - Batak Toba bible

JOSUA 13

¹I. [1] Jadi dung sarimatua si Josua, didok Jahowa ma tu ibana: Nunga sarimatua ho, jala godang situtu dope tano i tading sipapatuon.

²On do tano na tading i dope: Sandok parbalohan ni halak Palistim dohot sandok tano Gesur i.

³Olat ni Sihor na mardalan di Misir sahat ro di parbalohan Ekron tungkan utara, na masuk etongan tu halak Kanaan: Na lima raja ni halak Palistim, raja sian Gaza, Asdod, Askelon, Gad dohot sian Ekron, ro di halak Awi.

⁴Tungkan dangsina sandok tano ni halak Kanaan dohot Meara, na di halak Sidon, sahat ro di Apek, sahat tu parbalohan ni halak Amori.

⁵Angkup ni tano ni halak Gebal i dohot sandok Libanon, tungkan habinsaran, olat ni Baal-Gad na marbonahon dolok Hermon, tolhas ro di Hamat.

⁶Sude pangisi ni tor, olat ni Libanon sahat ro di Misrepot-Maim, sude halak Sidon, Ahu ma mangonjar nasida maradophon halak Israel. Rujirujihon sambing bahen partalian di Israel, songon na hutonahon i tu ho. [97†]

⁷On pe bagihon ma tano on bahen partalian di na sia marga dohot di satonga marga Manasse. II.

⁸Marga Manasse na satonganari rap dohot marga Ruben dohot Gad, nunga manjalo partalianna be, na nilehon ni si Musa tu nasida di bariba ni Jordan tungkan habinsaran, songon na nilehon ni si Musa, naposo ni Jahowa tu nasida. [98†]

⁹Olat ni Aroer, na martopihon sunge Arnon dohot huta na di tongatonga ni sunge i, ro di sandok adaran Medeba sahat tu Dibon.

¹⁰Dohot sude huta ni Sihon, raja ni halak Amori, na manggomgomi Hesbon sahat ro di parbalohan ni halak Amon.

¹¹Angkupni Gilead dohot tano ni halak Gesur i dohot Maaka i dohot sandok dolok Hermon dohot sandok Basan sahat tu Salka.

¹²Sandok gomgoman ni Og di Basan, na manggomgomi Astarot dohot Edrei: Ibana do na tinggal sian pasipasi ni pinompar ni si Repaim, na pinapatu ni si Musa jala dionjar.

¹³Alai ndang dionjar halak Israel anggo halak Gesur i dohot halak Maaka, maringan di tongatonga ni halak Israel do Gesur dohot Maaka rasirasa sadarion.

¹⁴Holan tu marga Lepi ndang dilehon ibana partalian, angka pelean situtungon tu Jahowa, Debata ni Israel tahe partalianna, songon na pinarbagana i tu nasida. [99†] III.

¹⁵Asa nunga dilehon si Musa hian partalian, anggo tu marga Ruben marsuhusuhu. [100†]

¹⁶Ia parbalohannasida olat ni Aroer na martopihon sunge Arnon dohot huta na di parsitongaan ni sunge i, ro di sandok tano pea na di lambung ni Medeba.

¹⁷Hesbon ro di sude hutana angka na di pea, Dibon dohot Bamot-Baal dohot Bet-Baal-Meon.

¹⁸Jahaz, Kadermat dohot Mepaat.

¹⁹Kiriataim, Sibma, Zeret Hasahar di atas dolok ni rura i.

²⁰Betpeor, angka tuatan ni Pisga dohot Betjesimot.

²¹Dohot sude huta di tano pea, ro di sandok harajaon ni Sihon, raja ni halak Amori, na manggomgom di Hesbon, na pinapatu ni si Musa, ibana dohot angka induk sian Midian, i ma Evi, Rekem, Sur, Hur dohot Reba, angka raja wakil ni Sihon, angka na maringan di tano i.

²²Dohot Bileam, anak ni si Beor, pangarunding i dibunu halak Israel marhitehite podang, ro di dongannasida angka na tartiham. [101†]

²³Jadi parbalohan ni tano ni halak Ruben, batang aek Jordan do ro di tobingna. I ma partalian ni halak Ruben marsuhusuhu, angka huta dohot sosor. IV.

²⁴Nunga dilehon si Musa hian anggo tu marga Gad, tu angka anak ni si Gad marsuhusuhu.

²⁵Ia parbalohannasida, i ma Jaser dohot sude huta di Gilead, dohot satonga ni tano ni halak Amon sahat ro di Aroer na di jolo ni Rabba.

²⁶Jala olat ni Hesbon sahat ro di Ramot-Mispa dohot Betonim, jala olat ni Mahanaim sahat ro di parbalohan ni Debir.

²⁷Dohot di rura Betharam, Betnimra, Sukot dohot Zapon, ebaeba sian harajaon ni Sihon, raja sian Hesbon, Jordan dohot tobingna, sahat ro di ujung ni tao Kinerot di bariba ni Jordan tungkan habinsaran.

²⁸I ma partalian ni halak Gad marsuhusuhu, angka huta dohot sosor. V.

²⁹Nunga dilehon si Musa hian partalian, nang tu satonga marga Manasse, gabe satonga Manasse nampunasa marsuhusuhu.

³⁰Jadi parbalohanna olat ni Mahanaim sandok Basan, saluhut harajaon ni si Og, raja sian Basan, dohot sude huta ni si Jair na di Basan, onompulu huta toropna. [102†]

³¹Dohot satonga Gilead, Astarot, Edrei, angka huta ni harajaon ni si Og di Basan, dilehon tu angka anak ni si Mahir, anak ni si Manasse, tu anak ni si Mahir na satonga marsuhusuhu.

³²I ma na binagi ni si Musa di adaran ni Moab, di bariba ni Jordan, tondong ni Jeriko tungkan habinsaran.

³³Alai tu marga Lepi ndang adong partalian dilehon si Musa, Jahowa Debata ni Israel, Ibana do partaliannasida, songon na pinarbagana i tu nasida. [103†]