Read Batak Toba JOSUA 8 Bible Online

JOSUA 8 - Batak Toba bible

JOSUA 8

¹I. [1] Dung i didok Jahowa ma tu si Josua: Unang ho mabiar, jala unang tahuton! Arahon ma sandok sialo musu, jala borhat ma ho nangkok dompak Ai. Ida ma, nunga hupasahat tu tanganmu raja ni Ai dohot bangsona, ro di hutana dohot tanona.

²Jala bahenonmu do tu Ai dohot tu rajana, songon na binahenmi tu Jeriko dohot tu rajana; holan tabantabanna dohot pinahanna, jadi do bagionmuna di hamu; alai bahen ma paronggopan sada di pudi ni huta i. [50†]

³Jadi borhat ma si Josua dohot sandok sialo musu laho nangkok tu Ai; jala dipillit si Josua ma tolupulu ribu halak, angka na begu marmusu, jala disuru nasida bornginna i.

⁴Jala ditonai ma nasida songon on: Monggop ma hamu tu pudi ni huta i; alai unang maholangku hamu sian huta i, jala managam ma saluhut hamu.

⁵Alai anggo ahu dohot sandok bangso na rap dohot ahu, dapothononnami ma huta i. Jadi molo ruar nasida manjumpangkon hami, songon na parjolo i, maporus ma hami maradophon nasida.

⁶Jadi ruar ma nasida mangeahi hami, paima husirang hami nasida sian huta i; ai dohononnasida ma: Maporus do nasida maradophon hita songon parjolo i. Jala di na maporus i hami maradophon nasida. [51†]

⁷Hehe ma ianggo hamu sian paronggopan, jala manoluk huta i; ai lehonon ni Jahowa Debatamuna ma huta i tu bagasan tanganmuna.

⁸Jala ia dung ditaban hamu huta i, surbuonmuna ma huta i dohot api; hombar tu hata ni Jahowa ma bahenonmuna. Ida ma, ahu do manonahon i tu hamu.

⁹Jadi disuru si Josua ma nasida, gabe laho nasida tu paronggopan i, jala monggop nasida diholangkolang ni Betel dohot Ai, tungkan hasundutan sian Ai, laos marborngin anggo si Josua di na saborngin i di tongatonga ni bangso i.

¹⁰Dung i manogotna i dipasogot si Josua ma parentahon angka parangan i, jala nangkok ibana dohot angka sintua ni Israel manguluhon angka parangan i tu Ai.

¹¹Jala sandok sialo musu na rap dohot ibana, nangkok do tolhas ro di tondong ni huta i, jala marsaro nasida tungkan utara sian Ai, holan rura sada holangholangna sian Ai.

¹²Dung i dibuat ibana ma arga lima ribu halak, jala didokkon nasida monggop di holangholang ni Betel dohot Ai, tungkan hasundutan ni huta i.

¹³Dung i dipaodor nasida ma parangan ni sandok parsaroan i na tungkan utara ni huta i, dohot angka na monggop i tungkan hasundutan ni huta i. Jadi mardalan ma si Josua di na saborngin i tu tongatonga ni rura i. II.

¹⁴Jadi dung diida raja ni Ai songon i, humalaput ma nasida, dipasogot angka baoa ni huta i ma ruar manjumpangkon Israel laho martongtang, rajai dohot sandok naposona tu tongtangan na tiniti di jolo ni adaran, ai ndang diboto ibana naung adong monggop musuna di pudi ni huta i.

¹⁵Jadi lumindak ma si Josua dohot sandok Israel maradophon nasida, jala maporus sian dalan tu halongonan.

¹⁶Dung i satingting ma sandok pangisi ni huta i mangeahi, jala dieahi nasida si Josua, gabe sirang nasida sian huta i.

¹⁷Jala ndang adong tading nanggo sahalak di Ai dohot di Betel, na so ruar mangeahi Israel, jala talak huta i ditadingkon nasida laho mangeak Israel.

¹⁸Dung i didok Jahowa ma tu si Josua: Paunjur ma hujur na di tanganmi dompak Ai; ai nunga hupasahat tu tanganmu huta i. Jadi dipaunjur si Josua ma hujurna di bagasan tanganna dompak huta i.

¹⁹Jadi hapogan ma angka na monggop i hehe sian ingananna, jala marlojong nasida, dung dipatoltol ibana tanganna, gabe masuk ma nasida tu huta i, jala ditaban, disiluhon nasida manurbu huta i.

²⁰Dung i humusor ma angka baoa sian Ai dompak pudi, gabe diida nasida ma martimpul timus ni huta i dompak langit, jala ndang adong be gogonasida maporus manang dompak dia; jala bangso na maporus dompak halongonan mulak muse mangalo dompak pangeahi.

²¹Alai dung diida si Josua dohot sandok Israel naung ditaban angka na monggop i huta i, jala naung martimpul timus ni huta i, mulak nasida, jala dibunu nasida sude angka baoa sian Ai.

²²Ruar ma dohot angka nasida sian huta i manjumpangkon nasida, jadi dihapit Israel i ma nasida tuk humaliang, jala dibunui nasida, paima soadong tading sian nasida nanggo sahalak maporus manang malua.

²³Dung i ditangkup nasida ma raja ni Ai songon i mangolu, jala diboan ibana tu si Josua.

²⁴Jadi dung siap dibunu Israel sandok isi ni Ai angka na di adaran na di halongonan, haporusanna nilelenasida i, jala ditampuli nasida saluhutna dohot podang sun siap, gabe mulak ma sandok Israel tu Ai, jala ditampuli pangisina i.

²⁵Jadi sude angka na rage di na sadari i sian baoa ro di boruboru, sampulu dua ribu ma sude isi ni huta Ai.

²⁶Alai ndang dipasuang si Josua tanganna, na pinaunjurna i hujur i, paima sun siap sude isi ni Ai. [52†]

²⁷Holan pinahan dohot taban sian huta i dibagi halak Israel di nasida, hombar tu hata ni Jahowa na tinonahonna tu si Josua.

²⁸Jadi disurbu si Josua ma Ai, jala dibahen parturanggongan tarulang salelenglelengna rasirasa sadarion.

²⁹Ianggo raja ni Ai digantung do tu hau sahat ro di botari. Alai manihir mata ni ari, didokkon si Josua ma paijuron bangkena i sian hau, jala ditimpalhon nasida ma i tu baba pintu ni harbangan ni huta i, jala dipatindang di atasna sada tambak bolon sian batu rasirasa sadarion. [53†] III.

³⁰Uju i ma dipauli si Josua sada langgatan di Jahowa, Debata ni Israel di atas dolok Ebal. [54†]

³¹Songon na tinonahon ni si Musa, naposo ni Jahowa tu halak Israel, songon na tarsurat di bagasan buku patik ni si Musa, sada langgatan sian batu angka na sobinarbar, na so hona bosi, gabe dipelehon ma di ginjangna angka pelean situtungon tu Jahowa, jala dipelehon angka pelean hamauliateon.

³²Dung i diuhirhon ibana ma disi tu angka batu i manduai patik ni si Musa, na tarsurat di adopan ni halak Israel.

³³Jadi sandok Israel dohot angka sintuana ro di angka partogi dohot panguhum jongjong angkupangkup di lambung ni poti di adopan ni angka malim dohot halak Lepi, angka na mangusung poti parpadanan ni Jahowa, songon i parripe, songon i raja huta satonga di robean ni dolok Gerizim, na satonganari di robean ni dolok Ebal, songon na tinonahon ni si Musa, naposo ni Jahowa hian laho mamasumasu bangso Israel na jolo. [55†]

³⁴Dung songon i, dijaha ibana ma saluhut hata ni patik i, pasupasu i dohot torutoru i, sude songon na tarsurat di bagasan buku patik.

³⁵Ndang adong nanggo sada hata sian saluhut hata ni tinonahon ni si Musa, na so jinaha ni si Josua di adopan ni sandok luhutan Israel, ro di angka inaina dohot dakdanak dohot halak dagang na manompang di tongatonganasida.