Read Batak Toba 2 TESSALONIK 1 Bible Online

2 TESSALONIK 1 - Batak Toba bible

2 TESSALONIK 1

¹Ahu surat tinongos ni si Paulus, si Silwanus dohot Timoteus mandapothon huria Tessalonik, na di bagasan Debata Amanta Dohot Tuhan Jesus Kristus. [1†]

²Asi ni roha dohot dame ma di hamu sian Debata Amanta dohot Tuhan Jesus Kristus! [2†]

³Tama situtu do hami mandok mauliate tongtong tu Debata siala hamu ale angka dongan, songon na patut, ai na ganda situtu do haporseaonmuna, laos tamba holong ni roha ni ganup hamu sama hamu. [3†]

⁴Pola hubaritahon hami hamu di angka huria ni Debata, mamuji habengeton dohot haporseaonmuna, di na masa tu hamu ragam ni pangaleleon dohot haporsuhon, angka na pinataontaonmuna. [4†]

⁵I ma tandana, paboa na ro ma paruhumon ni Debata na tigor i; asa disi ma patar hatauonmuna tu harajaon ni Debata, dung jolo manaon na porsuk i hamu humongkopsa. [5†]

⁶Molo tung i tingkos di roha ni Debata, mamaloshon haporsuhon tu angka na paporsukporsukkon hamu; [6†]

⁷alai hasonangan tu hamu, angka na pinaporsukporsuk i rap dohot hami, di na tarida Tuhan Jesus tuat sian banua ginjang rap dohot angka surusuruan ni hagogoonna. [7†]

⁸Di bagasan api na marnalanala ro ma Ibana mandabu uhum tu angka na so mananda Debata dohot tu angka na so mangoloi barita na uli ni Tuhanta Jesus. [8†]

⁹Jaloonnasida ma uhum, i ma hamagoan sisalelenglelengna sian adopan ni Tuhan i dohot sian hagogoonna na tongam i. [9†]

¹⁰Ai di na ro Ibana, marsangap ma Ibana dibahen angka na badiana, jala tarpuji ma Ibana dibahen saluhut naung mangkaporseai Ibana di ari i, ai saut do gabe porsea hamu di na huhatindangkon hami tu hamu. [10†]

¹¹Apala i ma tangiangnami tongtong, anggiat tung dipatau Debatanta hamu hombar tu panjouonna i, jala asa ditambai di hamu las ni roha di na denggan dohot ulaon haporseaon marhitehite hagogoon.

¹²Asa marsangap Goar ni Tuhanta Jesus di bagasan hamu; hamu pe naeng marsangap di bagasan Ibana, marguru tu asi ni roha ni Debatanta dohot Tuhan Jesus Kristus.