Read Batak Toba 2 TESSALONIK 3 Bible Online

2 TESSALONIK 3 - Batak Toba bible

2 TESSALONIK 3

¹Angkup ni i, tangiangkon hamu ma hami, ale angka dongan, asa marlojong hata ni Tuhan i jala marsangap songon na di hamu, [21†]

²anggiat malua hami sian halak na jengkel jala na jahat i; ai ndang saluhutna olo porsea.

³Alai haposan do Tuhan i: Patoguonna do rohamu jala ramotanna do hamu maralohon na jahat i. [22†]

⁴Na pos do rohanami mida hamu di bagasan Tuhan i, sai patupaonmuna do na hupodahon hami tu hamu, nang nuaeng, nang tu joloan on. [23†]

⁵Sai ditogutogu Tuhan i ma rohamuna tu holong ni roha ni Debata dohot tu habengeton ni kristus i!

⁶Alai mangasahon Goar ni Tuhanta Jesus kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami! [24†]

⁷Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna; [25†]

⁸ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen. [26†]

⁹Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami. [27†]

¹⁰Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan! [28†]

¹¹Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama.

¹²Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon. [29†]

¹³Alai anggo hamu, ale angka dongan, unang ma marnaloja hamu mambahen na denggan! [30†]

¹⁴Alai ia so olo deba tumangihon hatanami na tarsurat on, patanda hamu ma i; unang ma marparsaoran hamu dohot ibana, asa tarila ibana. [31†]

¹⁵Jala unang ma nian rajumi hamu ibana songon musu, pasingot hamu ma ibana tahe songon dongan!

¹⁶Alai manongtong jala mangimpas ma damena dilehon Tuhan Sipardame i tu hamuna! Didongani Tuhan i ma hamu sudena!

¹⁷On ma tabingku sian ahu, si Paulus, na sinurat ni tanganku. Songon i do somal tandatanganku di nasa surathu. [32†]

¹⁸Didongani asi ni roha ni Tuhanta Jesus Kristus ma hamu sudena!