Read Batak Toba 1 TIMOTEUS 1 Bible Online

1 TIMOTEUS 1 - Batak Toba bible

1 TIMOTEUS 1

¹I. [1] Ahu surat tinongos ni Paulus, apostel ni Kristus Jesus sian pandokkon ni Debata, Sipalua hita, dohot sian Kristus Jesus, pangkirimonta i, [1†]

²mandapothon si Timoteus, anakkonku na tutu di bagasan haporseaon: Asi ni roha, talup ni roha dohot dame sian Debata Ama dohot sian Kristus Jesus, Tuhanta i! [2†] II.

³Huapoi do ho, tinggal di Epesus, uju borhat ahu tu Makedonia, asa dirodihon ho tu na deba, unang dipodahon na lipe. [3†]

⁴Unang dijujur turiturian ro di surat sundutsundut na so marujung, angka na mantat parsalisian, gumodang asa parsombaon tu Debata marhitehite haporseaon. [4†]

⁵Alai na tinembak ni patik i do haholongon sian roha na ias, sian panolopi ni panggora ni roha, nang sian haporseaon na so marlaok. [5†]

⁶I do ditadingkon na deba, gabe marbalik tu hatahata na so gabeak. [6†]

⁷Naeng sipodahon patik i nasida: So adong diboto na hinatahon dohot na hinajongjongkonnasida.

⁸Alai taboto do, na denggan do patik i, molo hombar tusi pamangkena, [7†]

⁹ala diboto, na so dipajongjong patik di parroha na tigor, tung di angka na so maruhum do, di na so tumangihon hata, di na so mangkabiari Debata, di angka pardosa, i ma angka na ramun na so marpaho, angka sibalbal ama dohot ina, angka sipusa jolma,

¹⁰angka parmainan, sibahen rongkos tu na poso, angka pamangus, angka pargapgap, angka siallang gana dohot nasa na alo dompak poda na tiar i, [8†]

¹¹hombar tu barita na uli, naung dipasahat tu ahu, na taringot tu hasangapon ni na Martua Debata. [9†] III.

¹²Mauliate hudok di na margogoihon ahu, i ma Kristus Jesus, Tuhanta i; ai dietong do ahu haposan, umbahen na dipabangkit ahu gabe parhalado. [10†]

¹³Panginsahi do ahu najolo jala pangalele jala siulahon gogo; alai dapotan asi ni roha do ahu, ai ndang huboto na huula i, tagan so porsea i dope ahu. [11†]

¹⁴Alai gabe lam sumurung do asi ni roha ni Tuhanta i, mantat haporseaon dohot holong ni roha, di bagasan Kristus Jesus.

¹⁵Haposan jala sandok tau jaloon do hata on: Nunga ro Kristus Jesus tu portibi on, paluahon angka pardosa; sian angka i do ahu na parjolo. [12†]

¹⁶Alai ala ni on do, umbahen na diasii ahu: Naeng jumolo marhite sian ahu patuduhonon ni Kristus Jesus sandok lambas ni rohana i, bahen tiruan di angka na naeng porsea di Ibana tu hangoluan salelenglelengna.

¹⁷Alai hamuliaon dohot hasangapon sisalelenglelengna ma di Raja na so marmula i; i ma Debata na manongtong, na so dapot idaon, na mamunjung i! Amen. [13†] IV.

¹⁸I ma podahon, songon na huampehon tu ho, anakkonku, Timoteus, hombar tu hata panurirangon najolo, angka na taringot tu ho, asa marhitehite i ho manahan di paraloan na denggan i. [14†]

¹⁹Tiop ma haporseaon i, marroha na ias, na binolongkon ni na deba, gabe tarharom taringot tu haporseaon. [15†]

²⁰Songon Himeneus dohot Aleksander, naung hupasahat tu sibolis i, asa taruli ajar nasida, unang be manginsahi. [16†]