Read Batak Toba 1 TIMOTEUS 2 Bible Online

1 TIMOTEUS 2 - Batak Toba bible

1 TIMOTEUS 2

¹I. [1] Onpe, on do sipaingothu, naeng ma ulahononhon parjolo situtu pangidoan, partangiangon, parpangondianon dohot hamauliateon humongkop saluhut halak, [17†]

²humongkop angka raja dohot saluhut parhuaso, asa marsonangsonang jala so hariboriboan hita marpangalaho, di bagasan sandok hadaulaton dohot hahormaton.

³Na denggan do i, jala halomoan ni roha ni Debata, Sipalua hita. [18†]

⁴Ai dipangido rohana do, naeng saluhut jolma malua jala sahat mananda hasintongan i. [19†]

⁵Ai sada do Debata, jala sada do nang Pangulu ni Debata dohot jolma, i ma jolma Kristus Jesus i. [20†]

⁶Dilehon do dirina, bahen tobus humongkop saluhut, i ma sihatindangkononhon di tingki hadenggananna. [21†]

⁷Tusi do ahu dipabangkit, gabe parjamita jala apostel, gabe pangajari di halak sipelebegu, di bagasan haporseaon dohot hasintongan; tutu do hatangki, ndang margabus ahu. [22†] II.

⁸Asa dipangido rohangku: Naeng ma martangiang angka baoa di nasa inganan, sumombahon tangan na bontor, so marrimas, so marroha ganggu.

⁹Angka parompuan pe, songon i do: Pantun marabit, marpangkean hahormaton dohot toruk ni roha; unang ma marhitehite obuk na mardandan dohot sanggul mas dohot mutiha manang abit na arga. [23†]

¹⁰Alai naeng ma songon na tama di parompuan, angka na marhatopothon hadaulaton marhitehite angka ulaon na denggan. [24†]

¹¹Hohom ma parompuan marguru, marunduk ni roha situtu. [25†]

¹²Alai ndada huloas parompuan mangajari manang mangarajai hamulianna; mauhom ma nasida! [26†]

¹³Ai jumolo do si Adam ditompa; dung i pe, asa si Haoa. [27†]

¹⁴Jala ndada si Adam dipaotooto; parompuan i do dipaotooto, gabe pangalaosi. [28†]

¹⁵Alai dapotan haluaon do ibana marhitehite na mangintubu, molo mian nasida di bagasan haporseaon dohot haholongon ni roha, nang habadiaon mardongan hatomanon.