Read Batak Toba 1 TIMOTEUS 4 Bible Online

1 TIMOTEUS 4 - Batak Toba bible

1 TIMOTEUS 4

¹I. [1] Alai tangkas do didok Tondi i: Adong ma di angka ari sogot deba na marbalik sian haporseaon i; oloan ni i ma angka tondi sipaotooto dohot podapoda ni angka sibolis, [38†]

²bahenon ni ansiansi ni angka sihatahon gabus, angka na tinoruan ni panggora ni rohanasida.

³Diorai nasida do mardongan saripe; dipatik do jolma mangorom sipanganon, na jinadihon ni Debata, asa mardongan mauliate i dijalo angka na porsea, angka naung tumanda hasintongan i. [39†]

⁴Ai na denggan do nasa na tinompa ni Debata jala ndang sisubanghononhon nasa na jinalo mardongan roha mauliate. [40†]

⁵Ai na gabe badia do i, binahen ni hata ni Debata dohot tangiang.

⁶Anggo i diapohon ho tu angka dongan, gabe tutu ma ho parhalado ni Kristus Jesus, mangkangoluhon hata haporseaon i dohot poda na uli na niihuthonmi. II.

⁷Pasiding ma angka turiturian na so gabeak, na so marnosan i. Pasomalsomal ma dirim mangulahon hadaulaton! [41†]

⁸Ai otik do guna ni na pabosihon daging; alai tu saluhutna do hasea hadaulaton i, ai hangoluan nuaeng nang sogot dibagabagahon. [42†]

⁹Haposan do hata i jala tau situtu jaloon. [43†]

¹⁰Ai ala ni i do, umbahen loja hita jala marungkil: Ala mangkirim hita di Debata na mangolu, Sipalua halak saluhutna, alai sumurung angka na porsea.

¹¹I ma patikkon jala podahon! [44†]

¹²Unang ma hu roha ni halak mida ho siala haposoonmi; alai gabe tiruan ni angka na porsea ma ho di pangkataion, di parange, di holong ni roha, di haporseaon, nang di hatomanon. [45†]

¹³Sai datdati ma na manjahai, na mangapoi, nang na mangajari, paima ro ahu!

¹⁴Unang neang roham di silehonlehon na di ho i, na pinasahat tu ho marhitehite panurirangon dohot pangampehon tangan sian angka sintua. [46†]

¹⁵I ma pasarisari, i ma parangehon, asa patar diida sude hanaehanmi!

¹⁶Matahon dirim, ro di pamodaion i; mian ma ho disi! Ai molo i diula ho, paluaonmu ma dirim ro di angka na tumangihon ho. [47†]