Read Batak Toba 1 TIMOTEUS 5 Bible Online

1 TIMOTEUS 5 - Batak Toba bible

1 TIMOTEUS 5

¹I. [1] Unang songgahi na tuatua; alai apoi ma ibana songon ama, angka na poso i songon anggi; [48†]

²angka parompuan na tuatua songon ina, angka na umposo songon iboto; alai marhatomanon situtu.

³Parompuan na mabalu parsangapi, anggo na mabalu na tutu. [49†]

⁴Alai anggo maranakkon manang marpahompu ina na mabalu i, nasida ma jumolo sumarihon donganna sabagas i di bagasan hadaulaton, mambahen pamaloson tu natuatuana, ai i do dihalomohon Debata.

⁵Alai anggo na mabalu na tutu, na so mardihadiha, mangkirim ma tu Debata, jala manongtong mangido dohot martangiang arian dohot borngin. [50†]

⁶Alai anggo diulahon hisaphisap, naung mate do i, nang mangolu dope.

⁷I ma patikkon, asa so hasurahan nasida.

⁸Alai na so sumarihon donganna, haputusan donganna sabagas, naung mansoadahon haporseaon do i; jumahat do i sian halak na so porsea.

⁹Ndang sipilliton ina na mabalu, ia so gok onompulu taon umurna, naung sahali marhamulian.

¹⁰Ingkon denggan do ulaonna dihatindangkon halak: Anggo dipagodanggodang anakkonna, las rohana martamue, diburi pat ni angka na badia, diurupi angka na di bagasan haporsuhon, dieahi nasa ulaon na denggan. [51†]

¹¹Alai pasiding ma angka boruboru na mabalu na poso; ai ia dung garang rohanasida maralohon Kristus, naeng ma marhamulian nasida.

¹²Sisaritaon do nasida, ala nunga ditadingkon haburjuonnasida di mulana.

¹³Angkup ni i, marlanggelangge do nasida; diringkoti na merbaserbas tu bagas ni halak; alai tamba ni parlanggelanggeon i: Na gabe sihapodea do nasida, angka na juit, sihatahon na so marguna.

¹⁴Onpe, dipangido rohangku: Marhamulian ma angka na sopot mabalu, asa tubutubuan, patureturehon bagasna, unang dilehon tu alo i parbonsiran, laho manginsahi. [52†]

¹⁵Ai nunga sanga marbalik deba mangihuthon sibolis i.

¹⁶Alai molo adong na mabalu, na marsolhothon na porsea, i ma patureturehon nasida, asa tarpatureture huria i na mabalu na tutu. II.

¹⁷Silompit do jujuron hasangapon ni sintua, na burju mangula hasintuaon, gumodang ma tu angka na mangulahon hata dohot poda. [53†]

¹⁸Ai didok Surat i: “Ndang jadi huntamonmu baba ni horbo na mardege!” dohot: “Na tama do di pangula upana!” [54†]

¹⁹Unang jalo pangaluan dompak sintua, ia so di jolo ni dua manang tolu sitindangi. [55†]

²⁰Angka na mardosa i pinsang di jolo ni saluhutna, asa mabiar nang angka dongan. [56†]

²¹Humangmangi ho di jolo ni Debata dohot Kristus Jesus, nang di jolo ni surusuruan ni Debata, angka na tarpillit: Unang maralangalang roham mangaradoti angka ondeng, unang ma mardingkandingkan!

²²Unang hapogani mangampehon tanganmu tu halak; unang saor ho tu dosa ni na leban. Ramoti dirim, asa ias ho! [57†]

²³Unang sai minum aek ho; pangke ma anggur sasaotik, daon ni butuha, ai jotjot do ho gale.

²⁴Di na deba halak patar hian do dosana, tagan so songgop dope uhum; ia di na deba mangihut sian pudi nama.

²⁵Suang songon i: Patar do angka ulaon na denggan; jala nang pe asing, tong ndang tarbahensa buni!