Read Batak Toba 2 TIMOTEUS 1 Bible Online

2 TIMOTEUS 1 - Batak Toba bible

2 TIMOTEUS 1

¹I. [1] Ahu surat tinongos ni si Paulus, apostel ni Kristus Jesus, marhite sian tahi ni Debata, marguru tu bagabaga hangoluan, na di bagasan Kristus Jesus,

²mandapothon si Timoteus, anakkonku na hinaholongan: Asi ni roha, talup ni roha, dame sian Debata Ama dohot sian Kristus Jesus, Tuhanta i! II.

³Mauliate rohangku di Debata, na huoloi di bagasan roha na ias, sian angka daompung dope; ai so marpansohotan hupaingotingot ho di angka tangiangku, borngin nang arian. [1†]

⁴Ai masihol do ahu marnida ho, marningot iluilumi, anggiat gok halalas ni rohangku.

⁵Ai huingot do haporseaonmu na so marlaok i, na maringanan hian di bagasan ompungmu boru, si Lois, nang di bagasan inangmu, si Eunike; alai dohot do di bagasan ho, dihaporseai rohangku. [2†] III.

⁶Ala ni i hupaingot ho, asa diparatarata ho silehonlehon ni Debata, na tu ho i, di na huampehon tanganki tu ho. [3†]

⁷Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton. [4†]

⁸Onpe, unang ho maila, mangkatindangkon Tuhanta i, jala unang hailahon ahu, na tarhurung humongkop Ibana; dohot ma ho tahe mangkongkop barita na uli, sian hagogoon ni Debata! [5†]

⁹Ai dipalua jala dijou do hita marhitehite panjouon na badia; ndada marguru tu ulaonta, tung sian tahina dohot sian asi ni roha, na binasabasahon tu hita di bagasan Kristus Jesus, na sian mula ni mulana. [6†]

¹⁰Alai nuaeng dipapatar do, di na tarida Sipalua hita, Kristus Jesus i. Ibana do pasohothon hamatean, di paullop hangoluan dohot hatongtongon marhitehite barita na uli i. [7†]

¹¹Tusi do ahu dipabangkit, gabe parjamita dohot apostel dohot pangajari. [8†]

¹²Ala ni i do, umbahen na marsitaonon ahu, alai ndang maila ahu disi; ai hutanda do Ibana na huhaporseai, jala pos do rohangku, margogo Ibana mangaramoti na pinalumehonna i tu ahu, ro di ari sogot i.

¹³Ihuthon ma angka poda na tingkos i tiruanmu, songon naung binegem sian ahu, di bagasan haporseaon dohot holong ni roha na di Kristus Jesus i. [9†]

¹⁴Na pinalumehon na denggan i ma ramoti marhitehite Tondi Parbadia, na maringanan di bagasan hita. [10†] IV.

¹⁵Diboto ho do, naung ditundali saluhut na di Asia i ahu, songon Pigelus dohot Hermogenes. [11†]

¹⁶Sai dilehon Tuhan i ma asi ni roha tu bagas ni si Onesiporus; ai jotjot do sonang pangkilalaanku dibahen, jala ndang dihailahon ibana rantengki. [12†]

¹⁷Ai disi ro ibana tu huta Rom, dihaburjuhon do mangalului ahu, paima jumpangsa.

¹⁸Sai dilehon Tuhan i ma, asa jumpangan asi ni roha ibana sian Tuhan i di ari sogot i! Torang do diboto ho nasa panolongina di ahu di huta Epesus.