Read Batak Toba 2 TIMOTEUS 2 Bible Online

2 TIMOTEUS 2 - Batak Toba bible

2 TIMOTEUS 2

¹I. [1] Onpe, ale anaha, margogo ma ho marhitehite asi ni roha ni Kristus Jesus!

²Jadi ma binegem sian ahu di adopan ni torop sitindangi, i ma pasahat tu halak haposan, angka na tau mangajari na asing.

³Gabe dongan manaon haporsuhon ma ho, songon parangan na denggan di Kristus Jesus! [13†]

⁴Ndang olo alit parporang tu angka ulaon pandaraman, asa halomoan ibana di na marsuru ibana.

⁵Nang na marsiadu pe, ndang dipartumpali, ia so tigor paraloonna i. [14†]

⁶Ingkon siula hauma i jumolo taruli di parbuena! [15†]

⁷Antusi na hudok i; ai lehonon ni Tuhan i do tu ho roha mangarti saluhutna i.

⁸Paingotingot ma Jesus Kristus, naung dipangolu sian angka na mate, na sian pinompar ni si Daud, hombar tu na hubaritahon i. [16†]

⁹Ala ni i do ahu manaon na porsuk, pola tarrante songon siula hajahaton; alai ndang tarrante anggo hata ni Debata [17†]

¹⁰Dibahen i, benget do rohangku, manaon saluhutna i, ala ni angka na tarpillit, asa dohot nasida taruli di haluaon, na di bagasan Kristus Jesus, dohot di hasangapon salelenglelengna i. [18†]

¹¹Haposan do hata on: Anggo donganna do hita tu hamatean, donganna ma nang tu hangoluan. [19†]

¹²Anggo benget hita manaon, rap mangarajai ma hita sogot. Molo mansoadahon hita, dohot ma Ibana mansoadahon hita. [20†]

¹³So haposan pe hita, tong do haposan anggo Ibana; ai ndang tarsoadahonsa dirina. [21†] II.

¹⁴I ma pasingothon jala hatindangkon di jolo ni Debata; unang ma nasida masisualan, ai tung na so hasea do i, na mangago do i di angka na umbegesa. [22†]

¹⁵Haringgashon patuduhon haburjuonmi di Debata, songon pangula na so tarila, na padalanhon hata hasintongan i tigortigor. [23†]

¹⁶Alai pasiding ma pangkataion na so marimpola, na so gabeak i, ai lam tu gandana do hajahatonnasida hinorhon ni i. [24†]

¹⁷Songon baro sirarat lam ragat hatanasida; songon na di si Himeneus dohot Piletus. [25†]

¹⁸Na lilu do nasida sian hasintongan i, ai didok: Nunga sanga masa haheheon i, gabe marbalik deba sian haporseaon i. [26†]

¹⁹Alai na hot do haojahan na sian Debata. Hata on ma sahapna: “Ditanda Tuhan i do angka na di Ibana!” Dohot: “Sirang ma sian hageduhon nasa na mandok Goar ni Tuhan i!” [27†]

²⁰Ala ndada holan ulaula sere dohot perak dapot di bagasan bagas na bolon, dohot ma ulaula hau dohot tano; na deba tu ulaon hasangapon, na deba tu haleaon.

²¹Asa halak na paias dirina sian angka ondeng, i ma gabe ulaula na badia, na tu ulaon hasangapon, na hasea di nampuna bagas i, rade tu nasa ulaon na denggan.

²²Maporus ma ho pasiding sangkapsangkap haposoon; alai pareak ma hatigoran, haporseaon, holong ni roha dohot dame, rap dohot angka na manjou Tuhan i sian roha na ias. [28†]

²³Alai pasiding ma angka sungkunsungkun haotoon na ngongar, ai diboto ho, na mangkorhon parbadaan do i. [29†]

²⁴Na so patut parbadabada anggo naposo ni Tuhan i, alai tama basar maradophon saluhut, malo mangajari, benget manaon na jat; [30†]

²⁵marlambok ni roha ma maminsang angka na mangalo, anggiat dilehon Debata tu nasida hamubaon ni roha, laho mananda hasintongan,

²⁶asa tarjolma nasida, dung malua sian jorgong ni sibolis i, na nialithonna tu nasida, pasauthon roharohana. [31†]