Read Batak Toba 2 TIMOTEUS 4 Bible Online

2 TIMOTEUS 4 - Batak Toba bible

2 TIMOTEUS 4

¹I. [1] Di jolo ni Debata dohot Kristus Jesus, na ro manguhumi angka na mangolu dohot na mate, huhatindangkon nang hapataronna, nang harajaonna. [45†]

²Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion. [46†]

³Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokkon pinggolnasida. [47†]

⁴Taitonnasida ma pinggolnasida sian hasintongan i, laho paelengkonsa tu angka turiturian. [48†]

⁵Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi! [49†] II.

⁶Ai pasahaton nama anggo ahu songon pelean; na dapot ne ma tingki haluluangki! [50†]

⁷Nunga hupasidung paraloan na denggan i, nunga hupaujung parlojongonki; ramot hubahen haporseaon i. [51†]

⁸Diri nama di jolongku tumpal hatigoran, silehonon ni Tuhan, Paruhum na tigor i, di ari sogot i tu ahu; alai ndada holan tu ahu, tu saluhutna do tahe, angka na mangkaholongi hapataronna i. [52†]

⁹Pahatop manopot ahu tibu! [53†]

¹⁰Ai ditadingkon si Demas i do ahu, ala naung holong rohana di portibi on, laos laho tu Tessalonik; songon i si Kreskes tu Galatia si Titus tu Dalmatia. [54†]

¹¹Sasada si Lukas i nama donganku. Arahon si Markus i, jala boan ibana donganmu, ai hasea situtu do ibana tu parhobason. [55†]

¹²Ia si Tikikus i, nunga husuru tu Epesus. [56†]

¹³Molo ro ho, boan ma baju panas na hutinggalhon di si Karpus, di huta Troas; songon i angka buku, na rumingkot, i ma angka pustaha i!

¹⁴Godang hajahaton diula si Aleksander, pande bosi i, dompak ahu; baloshonon ni Tuhan i do tu ibana, hombar tu pambahenanna i. [57†]

¹⁵Ho pe, jaga ibana; ai dialo situtu do hatanami.

¹⁶Di paralusanku parjolo sahali, ndang adong donganku; tung saluhutna do manadingkon ahu. Unang ma tarrajum i tu nasida! [58†]

¹⁷Alai Tuhan i do mandongani jala margogoihon ahu, asa tulus parjamitaon i marhite sian ahu, gabe saluhut sipelebegu umbegesa; laos malua do ahu sian baba ni babiat i. [59†]

¹⁸Roroon ni Tuhan i do ahu sian nasa ulaon hajahaton, jala paluaonna do ahu tubagasan harajaonna na di banua ginjang i. Di Ibana ma hasangapon ro di salelenglelengna! Amen. III.

¹⁹Tabingku ma di si Priska dohot si Akila, songon i di pangisi ni bagas ni si Onesiporus. [60†]

²⁰Tinggal do si Erastus di Korint; alai marsahit do hutadingkon si Tropimus di Miletus. [61†]

²¹Gumira ma ho ro, andorang so taon ngali! Manongos tabi tu ho si Eubulus, si Pudes, si Linus, dohot si Klaudia ro di dongan sasude.

²²Didongani Tuhan i ma tondimuna! Asi ni roha ma di hamu!