Read Batak Toba PILEMON 1 Bible Online

PILEMON 1 - Batak Toba bible

PILEMON 1

¹I. [1] Ahu surat ni si Paulus, na tarihot ala ni Kristus Jesus, nang Timoteus, dongan i, mandapothon si Pilemon na hinaholongan, dongannami saulaon, [1†]

²laos mandapothon si Appia, ibotonami, dohot si Arkippus, dongannami marungkil, ro di huria na marluhut di bagasmu: [2†]

³Asi ni roha ma di hamu dohot dame sian Debata Amanta dohot sian Tuhan Jesus Kristus! [3†] II.

⁴Na mandok mauliate do ahu tu Debatangku tongtong, marningot ho di angka tangiangku. [4†]

⁵Ai hubege do holong ni roham dohot haporseaonmu di Tuhan Jesus dohot maradophon saluhut angka na badia. [5†]

⁶Anggiat ma marpangkorhon hasaoron ni haporseaonmi, laho mananda nasa na denggan na di bagasan hamu, maradophon Kristus i. [6†]

⁷Ai godang do di ahu halalas ni roha nang apulapul, dibahen holong ni roham, ai dipasabam ho do ateate ni angka na badia i, ale anggia. [7†] III.

⁸Onpe, godang do nian hiras ni rohangku di bagasan Kristus, mangarodihon na tama tu ho.

⁹Alai ala ni holong ni roha i, tagonan ma ahu mangelehelek. Nunga songon i ahu, Paulus, naung matua, jala tarihot nuaeng ala ni Kristus Jesus.

¹⁰Asa huelehelek ma ho; ala ni anakkonku, si Onesimus, na hutubuhon, di na tarihot on ahu. [8†]

¹¹Na so marguna do ibana najolo di ho; alai nuaeng marguna situtu do di ho, nang di ahu.

¹²Na husuru do ibana mulak tu ho; doshon rohangku do ibana huetong.

¹³Naeng do nian tioponku ibana, asa singkatmu ibana patureturehon ahu, di na tarrante on ahu ala ni barita na uli i. [9†]

¹⁴Alai ndang olo ahu mambahen agia aha, anggo so sian pamotoanmu, asa unang songon na so tarjua denggan basamu, naeng ma sian lomo ni roham. [10†]

¹⁵Atik i alana, umbahen na sirang ibana sangombas sian ho, asa gabe salelengna ibana di ho!

¹⁶Ndada be naposom ibana, tung lobi sian naposo, songon dongan na hinaholongan; lumobi di ahu, lam beha ma di ho: Mangihuthon ruhut tano on, tole di bagasan Tuhan i. [11†]

¹⁷Asa molo dietong ho ahu donganmu, jangkon ma ibana songon ahu!

¹⁸Alai molo tung adong salana manang utangna di ho, tu ahu ma i rajumi!

¹⁹Ahu, Paulus, manurathonsa dohot tanganku, paboa ahu sigarar i; unang jolo hudok tu ho, na marutang diri do ho tu ahu.

²⁰Olo tutu, anggia, naeng maruntung ahu sian ho di bagasan Tuhan i; pasabam ma ateatengku di bagasan Kristus i! [12†] IV.

²¹Ala pos rohangku, oloanmu ahu, umbahen na manurat ahu tu ho; ai huboto, patupaonmu do lumobi sian na hudok i.

²²Pature huhut inganan di ahu, ai dihirim rohangku, lehononna do ahu mulak tu hamu, dibahen angka tangiangmuna. [13†]

²³Manongos tabi tu ho: Si Epapras, donganku tarhurung di bagasan Kristus Jesus. [14†]

²⁴Songon i: Si Markus, Aristarkus, Demas, Lukas, angka donganku saulaon. [15†]

²⁵Didongani asi ni roha ni Tuhan Jesus Kristus ma tondimuna! [16†]