Read Batak Toba HEBER 1 Bible Online

HEBER 1 - Batak Toba bible

HEBER 1

¹I. [1] Jotjot jala ragam najolo pambahen ni Debata mangkuling i angka ama i marhitehite angka panurirang i.

²Alai di angka ari na parpudi on dipanghulingi do hita marhite sian Anak i. Ibana do dipabangkit gabe sitean parluhutan i, jala marhitehite Ibana do ditompa angka hasiangan i. [1†] II.

³Sillam ni hasangaponna dohot suman ni hadirionna do Ibana, jala diusung do parluhutan i marhitehite hatana na marhagogoon i. Jala dung dipatupa Ibana haiason sian angka dosa, hundul do Ibana tu siamun ni Hatongamon na di ginjang i. [2†]

⁴Songon surung ni Goarna na tineanna i, na mangatasi angka surusuruan, songon i do surung ni hasangaponna martimbangkon nasida. [3†]

⁵Ai tu surusuruan dia ma hea didok: “Anakku do Ho; sadari on do Ho hutubuhon”? Manang: “Ahu do gabe Amana, jala Ibana gabe Anakku”? [4†]

⁶Alai di na naeng togihononna muse tu portibi on Ibana na parjolo tubu i, disi ma didok: “Ingkon marsinggang tu jolona sude angka surusuruan ni Debata!” [5†]

⁷Didok do nian taringot tu angka surusuruan i: “Ibana mambahen alogo surusuruanna, api na marjimburjimbur do parhaladona.” [6†]

⁸Alai taringot tu Anak i didok: “Ro di salelenglelengna do habangsami, ale Debata; tungkot hatigoran do tungkot harajaonmi!” [7†]

⁹“Dihaholongi Ho do hatigoran jala dihagigihon Ho do hajahaton; ala ni i do dimiakkon Debatami miak halalas ni roha tu Ho, ale Debata, sumurung asa tu angka donganmi!”

¹⁰Dung i: “Ho, ale Tuhan, paojakkon tano on di mulana i, jala jadijadian ni tanganmu do parlangitan i.” [8†]

¹¹“Mago do angka i muse, alai tongtong do mian anggo Ho; laho buruk do i saluhutna songon ulos.”

¹²“Songon sampesampe balunonmu i sude, gabe muba ma; alai anggo Ho, laos tong do Ho, ndang mansohot angka taonmi!”

¹³Alai tu surusuruan dia ma hea didok: “Hundul ma Ho tu Siamunhon, paima hubahen angka musum sidegedegean ni patmu”? [9†]

¹⁴Nda saluhut nasida tondi parhobas, angka na sinuru, mangurupi angka sitean haluaon i? [10†]