Read Batak Toba HEBER 10 Bible Online

HEBER 10 - Batak Toba bible

HEBER 10

¹I. [1] Ai holan halinu ni angka parulian sogot do na di patik i, ndada anggo badanna. Ala ni i, sandok ndang tarbahen patik i mambahen sun denggan angka na sai ro tusi, mamboan pelean ganup taon. [100†]

²Ai aut i, pasadionnasida ma na mamele i, ala so adong be dosa siingoton ni nasida na marhalado i, anggo dung ias nasida sahali.

³Alai binahen ni angka pelean, mulak rata do ganup taon parningotan di dosa. [101†]

⁴Ai ndang tarbahen mudar ni angka jonggi manang hambing randuk pasaehon angka dosa.

⁵Ala ni i, ninna do di habobongotna i tu portibi on: “Ndang diparhagiot roham pelean manang silehonlehon; daging i do dipauli Ho di Ahu!” [102†]

⁶“Ndang lomo roham di pelean situtungon manang di pelean pardosaon.”

⁷“Jadi ningku ma: Na ro ma Ahu mangulahon lomo ni roham, ale Debata; di pustaha i do tarsurat taringot tu Ahu.”

⁸Didok jolo: “Ndang diparhagiot Ho pelean dohot silehonlehon, nang pelean situtungon manang pelean pardosaon, jala ndang lomo roham di na pinelehon mangihuthon patik.”

⁹Dung i didok ma: “Na ro ma Ahu, mangulahon lomo ni roham!” Disi ma dipasohot na parjolo i, asa dipajongjong na paduahon.

¹⁰Di bagasan lomo ni rohana i gabe angka na badia hita, binahen ni daging ni Jesus Kristus, naung pinelehonna, na sahali i. [103†]

¹¹Jala ganup malim jongjong do ariari marhalado dohot manjotjoti mamboan pelean, na sandok so tarbahen pasaehon dosa. [104†]

¹²Alai anggo Ibana, sada pelean sambing do diboan, pasaehon ro di salelenglelengna angka dosa; dung i hundul do Ibana di siamun ni Debata. [105†]

¹³Na maimaima nama Ibana, rasirasa dipampeakkon angka musuna bahen sidegedegean ni patna. [106†]

¹⁴Ai hinorhon ni pelean na sasada i, sun denggan do dipajongjong Ibana, ro di salelenglelengna, angka na olo pabadiaonna. [107†]

¹⁵Alai dohot do Tondi Parbadia i mangkatindangkonsa tu hita, ai didok do:

¹⁶“On ma padan sipajongjongonku tu nasida, dung salpu angka ari i, ninna Tuhan i: Lehononku ma angka patikku tubagasan ateatenasida jala surathononku ma i tu rohanasida,” [108†]

¹⁷“jala na so tupa be ingotonku dosanasida ro di hajahatonnasida!” [109†]

¹⁸Anggo dung sesa angka i, ndang be masa pelean pardosaon. II.

¹⁹Antong, ale angka dongan, adong do di hita hiras ni roha, laho bongot tu bagasan na badia i, di bagasan mudar ni Jesus; [110†]

²⁰ai dibungka do di hita dalan na imbaru jala na mangolu, sian rimberimbe i, i ma dagingna i; [111†]

²¹jala adong do di hita malim na bolon, sigomgom bagas ni Debata.

²²Dibahen i, tadapothon ma, marroha na sintong, di bagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi dagingta dohot aek na ias! [112†]

²³Momos ma tatiop pangkirimon na taparhatopot i, ai haposan do na marbagabagahonsa! [113†]

²⁴Masiantoan ma hita, masipajujuan tu haholongon dohot tu angka ulaon na denggan! [114†]

²⁵Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i! [115†]

²⁶Ai anggo tatuntun mardosa, dung jolo tajalo parbinotoan di hasintongan i, ndang adong be dapot pelean pasaehon dosa. [116†]

²⁷Uhum na jorbut nama sipaimaon dohot api ni haririmas, siallang angka na mangalo.

²⁸Sitompas patik ni si Musa ingkon mate do, anggo adong dua manang tolu sitindangi, so siat asi ni roha. [117†]

²⁹Timbang hamu ma: Sadia dumokdok ma uhum mangonai tu jolma, na mandegedegei Anak ni Debata jala na mansoadahon mudar parpadanan, parhitean ni habadiaonna nian, jala na manoisi Tondi Parasiroha i! [118†]

³⁰Ai tatanda do Ibana, naung mandok: “Ahu do nampuna, partubolon; Ahu do mamaloshon!” Dung i muse: “Uhumon ni Tuhan i do bangsona!” [119†]

³¹Jorbutna i, madabu tu tangan ni Debata na mangolu i!

³²Alai ingot hamu ma angka ari najolo; ai dung dipatiur hamu, ditaon hamu do godang parungkilon, i ma haporsuhon. [120†]

³³Na deba sian hamu gabe sitotonduran dibahen insahinsak dohot haporsuhon; na deba gabe saor tu angka na manaon songon i. [121†]

³⁴Ai rap manaon do hamu dohot angka na tarhurung; jala nang dirampas artamu, marlas ni roha do hamu manaon i, ala diboto hamu, adong do di hamu arta na ummangat jala na mian. [122†]

³⁵Onpe, unang ma bolongkon hamu hiras ni rohamuna, ai balga do upa ni i!

³⁶Ai habengeton do na ronsot di hamu, asa tarula hamu lomo ni roha ni Debata, jala dapot bagabaga i. [123†]

³⁷Ai “saotik nari sambing nama, ro ma na giot ro, jala ndang marnalemba!” [124†]

³⁸Alai sian haporseaon ma mangolu partigor i; jala ndang lomo rohangku di halak na sumurut. [125†]

³⁹Alai ndang sumurut anggo hita, asa tu hamagoan; na marhaporseaon do, laho mangomohon tondi.