Read Batak Toba HEBER 2 Bible Online

HEBER 2 - Batak Toba bible

HEBER 2

¹I. [1] Dibahen i, naeng ma muba gomosta, maniop hata naung tabege i, unang tung dibaorhon hita.

²Ai gari hata na hinatahon ni angka surusuruan i, gari hot do, jala nasa pangalaosion dohot hatoison mangalap pamaloson na hombar. [11†]

³Tagamon ma adong dapot haporusanta, molo tatoishon haluaon na sai godang i? Pola do Tuhan i mangkatahonsa di mulana i, jala momos dipasahat angka na umbegesa tu hita! [12†]

⁴Ai dohot do Debata mangkatindangkon marhitehite angka tanda dohot halongangan dohot ragam ni pambahenan hagogoon, nang marhitehite Tondi Parbadia, na sinagihonna guru lomo ni rohana. [13†] II.

⁵Ai ndada tu angka surusuruan i dipagomgomhon Ibana hasiangan sogot, na tahatahon on.

⁶Alai adong do na mangkatindangkon di Surat i: “Aha do jolma i, umbahen na diingot Ho Ibana; manang anak ni jolma i, umbahen na ditatap Ho ibana?” [14†]

⁷“Otik dipaoru Ho Ibana tu toru ni angka surusuruan. Hasangapon dohot hamuliaon ditumpalhon Ho tu Ibana.”

⁸“Saluhutna do dipatunduk Ho tutoru ni patna.” Ai di na pinatundukna i saluhutna i tu Ibana, ndang adong tading, na so unduk tu Ibana; alai anggo nuaeng, ndang taida dope, naung tunduk tu Ibana saluhutna i.

⁹Alai na pinaoruna i otik tutoru ni angka surusuruan i, i ma Jesus taida, na martumpalhon hasangapon dohot hamuliaon, ala nunga ditaonhon hamatean i, asa sian asi ni roha ni Debata Ibana mangahap hamatean i humongkop saluhut. [15†]

¹⁰Ai Ibana, hapatean jala parmulaan ni nasa na adong, dung jolo ditogihon Ibana torop anak tu hasangapon, tama Ibana, parmulaan ni haluaonnasida i, dipajongjong sun denggan marhitehite sitaonon. [16†] III.

¹¹Ai marharoroan sian na Sada do saluhutna, na pabadiahon dohot na pinabadiana i; ala ni i ndang dihailahon Ibana, manggoar nasida angka anggina. [17†]

¹²Ai ninna do: “Baritahononku do Goarmu tu angka anggingku; di tongatonga ni huria i do endehononku Ho!” [18†]

¹³Dung i muse: “Ibana do bahenonku haposanku!” Jala muse: “Dison do Ahu dohot dakdanak i, angka na nilehon ni Debata tu Ahu!” [19†]

¹⁴Asa songon dakdanak partohap di mudar dohot di sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate, [20†]

¹⁵asa dipalua sasude na pinarhatoban ni biar ni roha managam hamatean, saleleng mangolu.

¹⁶Ai apala angka surusuruan disarihon, pomparan ni Abraham i do!

¹⁷Ala ni i, ingkon gabe dos situtu Ibana tu angka anggina asa gabe parasiroha Ibana jala sintua ni malim haposan maradophon Debata, laho pasaehon angka dosa ni bangso i. [21†]

¹⁸Ai intap naung marsitaonon Ibana di na tarunjun i, haurupan Ibana do angka na tarunjun i. [22†]