Read Batak Toba HEBER 6 Bible Online

HEBER 6 - Batak Toba bible

HEBER 6

¹I. [1] Onpe, unang ma jolo tataringoti be poda mulamula na taringot tu Kristus; tadapothon ma na rimpas i! Unang pola taulahi pauli ojahan taringot tu na paubahon roha, manundalhon ulaon hamatean, mangkaporseai Debata,

²manang poda taringot tu pandidion dohot na mangampehon tangan, taringot tu haheheon ni angka naung mate dohot uhum sogot.

³I ma bahenonta, molo tung diloas Debata.

⁴Ai nasida, angka naung sanga dipatiur, angka naung mandai silehonlehon parbanua ginjang, angka naung gabe partohap di Tondi Parbadia, [54†]

⁵angka naung mandai hata na uli na sian Debata ro di angka hagogoon ni hasiangan sogot:

⁶Molo tung marbalik nasida, tung na so tarpaimbaru do nasida, asa muba muse, ai naung mangulahi pasilangkon Anak ni Debata do nasida di dirina, jala dipaurak.

⁷Ai tano na mangonsop udan, na sai ro tusi, gabe ditubuhon suansuanan na hasea di angka na mangulasa, i do taruli di pasupasu sian Debata.

⁸Alai na tumubuhon sihupi dohot bajora, ndang na hasea i; bura do sitagamon ni i, jala mosokkononna nama i di ujungna. II.

⁹Alai hudok hami pe songon i, ale angka haholongan, na dumenggan i do huhirim i hami di hamu, i ma na martohap di haluaon.

¹⁰Ai ndang na geduk Debata: Tung halupahononna ma na niulamuna dohot holong ni roha na pinatuduhonmuna tu Goarna, di pangkobasionmuna di angka na badia i najolo ro di nuaeng? [55†]

¹¹Alai dipangido rohanami do, naeng patuduhonon ni ganup hamu ringkot ni roha na songon i, patasakkon pangkirimon i sahat ro di ujungna. [56†]

¹²Unang ma gabe angka na losok hamu; tiru hamu ma angka sitean bagabaga i, marhitehite haporseaon dohot lambas ni roha!

¹³Ai laho mangalehon bagabagana tu si Abraham, di dirina do maruari Debata, ala so adong na umbalga paruarianna. [57†]

¹⁴On do hatana: “Pasupasuonku situtu do ho jala patoroponku do ho, asa tung torop!”

¹⁵Jadi dipalambas do rohana; i do dalanna, gabe dapotsa na pinarbagabaga i.

¹⁶Ai anggo jolma, na umbalga sian nasida do dibahen paruarianna; jala pamomoshon do uari i, papatehon nasa parsalisian. [58†]

¹⁷Ia Debata, uari do dipangke, laho patuduhon tu angka sitean bagabaga i tahina, na so olo muba i,

¹⁸asa dapotan apoapo na margogo hita, horhonon ni na dua partinandaan, na so olo muba, ai na so tarbahen Debata margabus; tusi do hita marhaporusan, laho marsitiopan tu pangkirimon na di jolonta i.

¹⁹Na songon sao di tondinta do i, na hot jala na togu, na manorusi sahat tu bagasan ni rimberimbe i.

²⁰Tusi do bongot Patujolonta, i ma Jesus, naung gabe sintua ni malim salelenglelengna, mangihuthon horong ni si Melkisedek. [59†]