Read Batak Toba HEBER 8 Bible Online

HEBER 8 - Batak Toba bible

HEBER 8

¹Asa on do na rumingkot di hata on: Adong do di hita sintua ni malim, na hundul di siamun ni habangsa Hatongamon na di banua ginjang i, [72†]

²siradoti angka ulaon na badia ro di joro na tutu i, naung dipauli Tuhan i, ndada jolma.

³Ai ganup sintua ni malim dipabangkit do, asa dipelehon silehonlehon dohot pelean; asa ingkon adong nang di Ibana sipelehononna. [73†]

⁴Aut sura di tano on Ibana, ndang suraon malim Ibana, ala adong do na mamelehon angka silehonlehon mangihuthon patik i.

⁵Diradoti nasida do tiruan dohot halinu ni na di banua ginjang i, songon na dapotan poda si Musa sian ginjang, uju naeng paulionna joro i: “Bereng ma, ninna, ‘asa paulionmu saluhutna i tudos tu tiruan, naung di patuduhon tu ho di dolok i!’ ” [74†]

⁶Alai dapot Ibana do tohonan na sumurung nuaeng, ai Pangulu do Ibana di parpadanan na sumurung, na niaturhonna marojahan di bagabaga na dumenggan. [75†]

⁷Ai aut so hasurahan na parjolo i, ndang tagamon luluanna hasiatan ni na paduahon on.

⁸Ai dihata do nasida, di na nidokna i: “Na ro ma angka ari, ninna Tuhan i, pajongjongonku ma disi padan na imbaru tu pinompar ni Israel dohot Juda!” [76†]

⁹“Ndada suman tu padan na hupajongjong di angka amanasida, manogihon nasida ruar sian tano Misir; ai so mian nasida di bagasan parpadananki; nang Ahu pe, ndang hupasarisari nasida, ninna Tuhan i.” [77†]

¹⁰“Ai on do padan na naeng pajongjongonku tu pinompar ni Israel, dung salpu angka ari i, ninna Tuhan i: Lehononku do angka patikku tu bagasan rohanasida jala tu ateatenasida surathononku i; dung i gabe Debatanasida ma Ahu, jala nasida gabe bangsongku.”

¹¹“Jala ndang pola be diajari halak donganna sabangso manang hahaanggina pe, mandok: Tanda ma Tuhan i! Ai tandaonnasida luhutna do Ahu, angka na metmet nang angka na magodang pe.”

¹²“Ai marpamuati do rohangku mida hageduhonnasida, jala na so tupa be ingotonku angka dosanasida.”

¹³Di na tinaringotanna na imbaru i, dipaburukburuk ma na jumolo i. Alai na laho salpu ma nasa naung gabe buruk jala matua. [78†]