Read Batak Toba HEBER 9 Bible Online

HEBER 9 - Batak Toba bible

HEBER 9

¹I. [1] Asa adong do nian nang di na parjolo i angka uhum ni parhaladoon, ro di joro na marrumang tano on.

²Ai dipauli do inganan jolojolo i; di bagasan i do: Parpalitoan i ro di meja dohot roti na marhadohoan; i do na margoar: Na badia. [79†]

³Alai di pudi ni rimberimbe paduahon i do inganan na margoar: Na badia situtu. [80†]

⁴Disi do langgatan pardaupaan sere dohot poti parpadanan, na nilampisan saluhut dohot sere, dibagasanna do guriguri sere na marisi manna i dohot tungkot ni si Aron na martumbur i, ro di batu panuratan padan i; [81†]

⁵jala di atasna Kerubim di hasangapon, na mangalinggomi langkop pardengganan i. Ndang tarhatahon i saonari sadasada. [82†]

⁶Dung songon i dipauli, gabe manongtong ma bongot angka malim tu bagasan inganan jolojolo i, mangulahon parhaladoon i. [83†]

⁷Alai tubagasan na paduahon i, holan sintua ni malim i do, sahali sataon, jala ndang tarbahen so mantat mudar, sipelehononna ala ni dirina dohot ala ni dosa haotoon ni bangso i. [84†]

⁸Marhitehite i do dipatuduhon Tondi Parbadia i, paboa na so dipapatar dope dalan tu na badia i, saleleng hot dope joro na parjolo i: [85†]

⁹Tudutudu tu tingki on nuaeng; ai dipelehon do disi silehonlehon dohot pelean, angka na so tuk pasonangkon situtu panggora ni roha ni na marhalado i. [86†]

¹⁰Angka sipanganon dohot siinumon ro di ragam ni pandidion sambing do i, hatigoran ni sibuk, angka na pinatikkonna, paima ro arina patingkoshon. [87†] II.

¹¹Alai ro do Kristus; Ibana do sintua ni malim ni angka parulian na naeng ro i. Jala na sahali i do dibongoti na sun badia i, marhite sian joro na umbalga jala na mauliutus na so pinauli ni tangan, na so sian panompaon on; [88†]

¹²ndada marhitehite mudar ni angka hambing randuk manang anak ni lombu, tung marhitehite mudarna sandiri, gabe dipatupa haluaon salelenglelengna.

¹³Ai gari mudar ni hambing randuk dohot jonggi dohot lombu, naung diparsiragongi, dipistikkon tu angka na ramun, mangkorhon haiason ni sibuk: [89†]

¹⁴Nda lam tumangkas ma mudar ni Kristus i paiashon rohamuna sian angka ulaon hamatean, laho mangoloi Debata Siparngolu i; ai dipelehon do dirina so marlindang tu Debata, marhitehite Tondi na manongtong i! [90†]

¹⁵Jadi ala ni on, umbahen na gabe pangulu di padan (testament) na imbaru Ibana: Asa dijalo angka na tarjou i bagabaga i, i ma siteanon na so olo muba i; dung jolo adong na mate, laho pasaehon angka pangalaosion, uju di padan na parjolo i. [91†]

¹⁶Ai anggo adong padan testament, ingkon tandap mate sibahen testament i.

¹⁷Ai dung pe mate halak i, asa hot testament i; ai nda tung margogo i, saleleng mangolu dope na mambahensa.

¹⁸Ai nang padan na parjolo i, marhitehite mudar do i dipasahat.

¹⁹Ai dung dihatahon si Musa tu sandok natorop i nasa tona mangihuthon patik i, dibuat ma mudar ni anak ni lombu dohot hambing randuk mardongan aek, hapas na rara dohot limut isop, dipispisi ma pustaha i sandiri ro di sandok natorop i. [92†]

²⁰Huhut ma didok: “On ma mudar ni padan na niaturhon ni Debata di hamu!”

²¹Laos songon i ma dipispishon mudar i tu joro i dohot tu saluhut ulaula na badia i. [93†]

²²Jala hira saluhutna do diurasi marhitehite mudar mangihuthon patik i; jala holan marhitehite na mandurushon mudar tulus hasesaan. [94†]

²³Asa ingkon songon i do diurasi na tiniru sian na di banua ginjang i; alai na di banua ginjang i hian, marhite sian pelean na ummangat do! [95†]

²⁴Ai ndada bongot Kristus tubagasan na badia na pinauli ni tangan, gombaran ni na sintong i; tung tu bagasan banua ginjang sandiri do, laho patuduhon dirina nuaeng di adopan ni Debata, humongkop hita. [96†]

²⁵Ndada laho mamelehon dirina jotjot, songon sintua ni malim i, na mambongoti na badia i jojor taon marhitehite mudar ni na leban.

²⁶Aut i, ingkon jotjot ma Ibana marsitaonon, olat ni haoojak ni hasiangan on. Alai sahali do gabe patar Ibana di ujung ni angka ari on, laho pasohothon dosa i, binahen ni na pinelehonna i dirina. [97†]

²⁷Songon na ampe tu jolma: Mate sahali, dung i uhum i; [98†]

²⁸songon i do nang Kristus, naung sahali dipasahat, laho mamorsan dosa ni natorop i; alai paduahalihon ndada ala ni dosa, tarida ma Ibana disi, mantat haluaon di angka na paipaimahon Ibana. [99†]