Read Batak Toba JAKOBUS 2 Bible Online

JAKOBUS 2 - Batak Toba bible

JAKOBUS 2

¹I. [1] Ale angka donganku, unang ma siidaida bohi hamu, angka na porsea di Tuhanta Jesus Kristus na marsangap i! [19†]

²Ai adong ma ro tu bagasan parguruanmuna sahalak partintin sere jala parulos na arga, ro ma huhut sahalak na pogos, marabit na humurang.

³Jadi dibereng hamu ma na marabit na denggan, didok hamu ma: Denggan ma ho juguk dison; alai tu na pogos i didok hamu: Disan ma ho jongjong, manang hundul ma ho tu na hudege on!

⁴Nda nunga marbagi dua rohamu disi; nda nunga manguhumi hamu mangihuthon pingkiran na jahat?

⁵Tangihon hamu ma, ale angka donganku na hinaholongan: Nda dipillit Debata angka na pogos di portibi on, asa mamora nasida marhitehite haporseaon jala panean di harajaon, na pinarbagabagana tu angka na holong roha di Ibana? [20†]

⁶Alai dileai hamu do na pogos i. Nda angka na mora i na paporsukporsukkon hamu jala manaratnarat hamu tu paruhuman?

⁷Nda nasida do na manginsahi Goar na denggan i, naung digoarhon tu hamu? II.

⁸Sibahen na denggan do hamu, antong, molo marguru tu Surat i diulahon hamu patik raja on: “Haholongi donganmi songon dirim!” [21†]

⁹Alai molo siida bohi hamu, na mangulahon dosa do hamu disi, gabe diuhumi patik i hamu songon pangalaosi. [22†]

¹⁰Ai aut sura diradoti jolma saluhut patik i, alai tinggang di na sada, nunga gabe parsala ibana di saluhutna. [23†]

¹¹Ai Ibana na mandok: “Unang ma ho mangalangkup!,” laos Ibana do mandok: “Unang ho mambunu!” Asa molo so mangalangkup ho, alai mambunu do, tong do ho pangalaosi di patik! [24†]

¹²Di nasa hata dohot ulaonmuna ingot hamu ma: Siuhumon do hamu, bahenon ni patik haluaon i!

¹³Ai uhum na so marasi ni roha ma tu na so mangulahon asi ni roha; na monang do asi ni roha maralohon uhum. [25†] III.

¹⁴Aha ma gunana, ale angka donganku, molo didok halak, di ibana do haporseaon; alai ndang adong di ibana pangulaon. Tarbahen do haporseaon i paluahon ibana? [26†]

¹⁵Molo adong dongan baoa manang boruboru, na marsaemara jala hurangan di sipanganon siap ari,

¹⁶gabe adong na mandok sian tongatongamuna: Laho ma hamu mardamedame, las ma hamu, bosur ma hamu; alai ndang dilehon hamu tu nasida na ringkot di daging, aha ma gunana? [27†]

¹⁷Haporseaon i pe songon i do: Anggo so adong pangulaonna, naung mate do hadirionna.

¹⁸Alai adong ma na mandok: Di ho do haporseaon; di ahu do pangulaon! Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku. [28†]

¹⁹Na porsea do ho, adong Debata sisadasada. Taho ma i; dohot do angka sibolis porsea disi, jala angka dotdot!

²⁰Alai ho, ale jolma na rumar, naeng botoonmu, na so marguna haporseaon, anggo so marulaon?

²¹Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? [29†]

²²Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i.

²³Jadi jumpang ma na nidok ni Surat i: “Dihaporseai si Abraham do Debata, jala i do dirajumi tu ibana gabe hatigoranna” jala targoar do ibana “aleale ni Debata.” [30†]

²⁴Asa diida hamu do: Sian angka pangulaon i do gabe tigor jolma, ndada holan sian haporseaon.

²⁵Songon i do nang si Rahab boruboru na jahat i; nda sian angka pangulaon do ibana gabe tigor, di na jinangkonna i angka suruan jala dipalua do nasida sian dalan na asing? [31†]

²⁶Ai songon daging i na mate, anggo so martondi; songon i do mate haporseaon na so marulaon. [32†]