Read Batak Toba JAKOBUS 4 Bible Online

JAKOBUS 4 - Batak Toba bible

JAKOBUS 4

¹I. [1] Sian dia do angka parbadaon dohot parmusuon na di hamu? Nda sian hisaphisap, angka na maralo di bagasan angka ruasmuna! [41†]

²Na marsangkapi do rohamuna, alai ndang dapotan; na mambunu do hamu jala mangiburu, laos so taruli hamu. Na masialoan do hamu jala marmusu, so adong di hamu, ala so martangiang hamu.

³Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna.

⁴Hamu angka pangalangkup, ndang diboto hamu, hamusuon dompak Debata do paralealeon dohot portibi on? Asa, na naeng aleale ni portibi on, dipajongjong do dirina, gabe alo ni Debata. [42†]

⁵Manang ninna rohamuna, gait do na nidok ni Surat i? Pangiburu do Tondi i, naung dipadiri di bagasan hamu. [43†]

⁶Alai lam gumodang do asi ni roha dilehon; ala ni i do didok: “Dialo Debata do angka na ginjang roha, alai dilehon do asi ni roha tu angka na serep marroha!” [44†]

⁷Antong, oloi hamu ma Debata; alo hamu ma sibolis i, dung i maporus ma ibana sian hamu. [45†]

⁸Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha! [46†]

⁹Arsakkon hamu ma jeamuna; mangangguhi jala tumatangis ma hamu; muba ma parengkelonmuna gabe partangison, nang halalas ni roha gabe arsak ni roha!

¹⁰Paserep hamu ma rohamuna maradophon Tuhan i, dung i patimboonna ma hamu. [47†]

¹¹Unang ma hamu masipahatahataan, ale angka dongan; na mangkatahata jala manguhumuhumi donganna, mangkatahata jala manguhumuhumi patik do i. Alai molo diuhumi ho patik i, panguhum do ho, ndada siula na nidok ni patik i.

¹²Sada do Sipajongjong patik jala Panguhum; i do na tarbahen paluahon dohot mangagohon. Alai ho, ise do ho, umbahen na diuhumi ho donganmu? [48†] II.

¹³E hamu, didok hamu do: Sadari on manang marsogot laho ma hami tu huta adui, asa disi hami sataon martigatiga jala mangomoomo. [49†]

¹⁴So adong diboto hamu na masa marsogot; ai aha do hosamuna! Suman ma hamu tu timus, na tarida satongkin, dung i gabe so haidaan be. [50†]

¹⁵Singkat ni i ma nian dohononmuna: Molo na lomo roha ni Tuhan i, mangolu ma hami, jala bahenonnami ma on dohot an. [51†]

¹⁶Hape ditengatengahon hamu do hata manggang muna; na jahat do nasa panenganengahon sisongon i.

¹⁷Antong, na umboto mambahen na denggan, gabe ndang diulahon, na mardosa ma ibana disi. [52†]