Read Batak Toba 2 PETRUS 1 Bible Online

2 PETRUS 1 - Batak Toba bible

2 PETRUS 1

¹I. [1] Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i: [1†]

²Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i! [2†] II.

³Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri. [3†]

⁴Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahisapon na di portibi on.

⁵Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i; [4†]

⁶dung i pangarajaion diri ma di bagasan habisuhon i, dung i habengeton ma di bagasan pangarajaion diri i, dung i hadaulaton ma di bagasan habengeton i:

⁷Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i! [5†]

⁸Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i.

⁹Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo. [6†]

¹⁰Dibahen i, ale angka dongan, lam ringgas ma hamu pahothon panjouonna dohot pamillitonna di hamu; ai molo diulahon hamu i, ndang olo be hamu tinggang.

¹¹Songon i ma buas lehononna tu hamu hamasuhon tu bagasan, harajaon salelenglelengna, na di Tuhanta Jesus Kristus, Sipalua i. III.

¹²Dibahen i, tongtong do hupaingothon angka i tu hamu, atik pe naung diboto hamu i jala naung togu rohamuna di bagasan hasintongan, na di hamu nuaeng. [7†]

¹³Alai tama do, didok rohangku, ahu manungguli hamu marhitehite hata sipaingot, saleleng di bagasan balebale on dope ahu. [8†]

¹⁴Ai huboto, tibu nama tadingkononku balebalengkon, songon naung pinabotohon ni Tuhanta Jesus Kristus tu ahu. [9†]

¹⁵Alai huharingkothon do, asa tongtong tarbahen hamu marningot i, dung borhat ahu.

¹⁶Ai ndada huihuthon hami angka turiturian na piningkir ni na bisuk, di na hupabotohon hami tu hamu hagogoon dohot haroro ni Tuhanta Jesus Kristus; tung diida matanami do hatongamonna i.

¹⁷Ai dijalo do hamuliaon dohot hasangapon sian Debata Ama, di na masa tu Ibana sian hasangapon na tongam i soara on: “On do Anakku, haholongan ni rohangku; na lomo do rohangku di Ibana!” [10†]

¹⁸I ma soara, na hubege hami ro sian banua ginjang i, uju rap hami dohot Ibana di dolok na badia i. [11†] IV.

¹⁹Jadi lam hot ma, antong, hata panurirangon i di hami; jala tama marsitiopan tusi ma hamu, songon na tu palito na marsinondang di inganan na holom, paima tarida siulubalang ari i, jala binsar siboan hatiuron di bagasan rohamuna.

²⁰On ma parjolo boto hamu: Ndang dapot hatorangan ni nasa panurirangon na tarsurat, anggo sian roha ni jolma.

²¹Ai ndang dung sian tahi ni jolma haroroan ni panurirangon; alai tinogihon ni Tondi Parbadia do, umbahen na marsoara angka jolma, disuru Debata. [12†]