Read Batak Toba 2 PETRUS 3 Bible Online

2 PETRUS 3 - Batak Toba bible

2 PETRUS 3

¹I. [1] On ma surat na paduahon, na husurat tu hamu, angka haholongan, manungguli bontor ni roha di hamu, marhitehite hata sipaingot, [29†]

²asa diingot hamu hata angka naung hinatahon ni angka panurirang na badia i, nang patik ni Tuhan jala Sipalua i, na binaritahon ni angka apostelmuna. [30†]

³On ma na rumingkot botoonmuna: Na ro ma di angka ari parpudi angka pangalensem, parhata insahinsak, na mangoloi angka hisapna sandiri; [31†]

⁴angka na mandok: Didia do harorona, na pinarbagabaga i? Ai dung monding angka amanta, hot do saluhutna songon i, sian mula ni hasiangan on! [32†]

⁵Laho mandok songon i, ndang manganto rohanasida, naung sian aek do langit nang tano, jala marhitehite aek do hajajadina hinorhon ni hata ni Debata. [33†]

⁶Laos marhitehite aek i do mago uju i tano on, dilantaphon aek i. [34†]

⁷Jala marhite sian hata i do diramoti Ibana langit dohot tano nuaeng; dipeop do, asa tu api di ari paruhuman jala hamagaon ni jolma angka na jahat. [35†]

⁸Alai tangkas ma ingot hamu, angka haholongan: Sada ari do di Tuhan i songon saribu taon, jala saribu taon songon sada ari! [36†]

⁹Ndang dipagele Tuhan i bagabaga i, songon na nidok ni roha ni na deba; alai lambas do rohana mida hamu, ai dipangido rohana, naeng unang ma nian mago agia ise, naeng ma tahe saluhutna sahat tu hamubaon ni roha. [37†]

¹⁰Alai na ro ma ari ni Tuhan i, songon panangko; mardorop ma disi langit i, laho sega; masarsar ma sisiasia ni tano on bahenon ni api; songon i nang tano i, ro di sude ulaon na di atasna, masoksok ma. [38†] II.

¹¹Antong, anggo masarsar do hape saluhutna on, nda lam sumurung ma parange na badia dohot hadaulaton

¹²ni angka na paimaimahon jala mangkasiholi haroro ni ari ni Debata, di na masarsar langit i disoksohi, jala malala tartutung do angka sisiasiana!

¹³Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana. [39†]

¹⁴Dibahen i, hamu angka haholongan, anggo i dipaimaima hamu, ringkoti hamu ma, asa didapot Ibana hamu so martihas, so hasurahan, di bagasan dame! [40†]

¹⁵Rajumi hamu ma lambas ni roha ni Tuhanta haluaonmuna, songon naung manurat tu hamu dongan haholonganta, si Paulus i, marguru tu parbinotoan, naung dilehon tu ibana. [41†]

¹⁶Songon i di saluhut angka suratna, i dipatorang; adong do deba disi na maol antusan, i ma dipalipe angka na so marroha jala na so togu rohana, nang di surat na asing pe, bahen hamagoannasida sandiri.

¹⁷Antong, hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna. [42†]

¹⁸Alai lam ganda ma di hamu asi ni roha dohot panandaon di Tuhanta Jesus Kristus, Sipalua i! Di Ibana ma hasangapon, nang nuaeng, nang ro di salelenglelengna!