Read Batak Toba 1 JOHANNES 2 Bible Online

1 JOHANNES 2 - Batak Toba bible

1 JOHANNES 2

¹I. [1] Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i. [8†]

²Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. [9†]

³Sian on do taboto, naung tatanda Ibana: Molo taradoti angka patikna.

⁴Na mandok: Hutanda do Ibana; alai ndang diradoti patikna, pargabus do i, ndang adong hasintongan di bagasan ibana.

⁵Alai na mangaradoti hatana, naung tutu ma gok haholongon ni roha ni Debata di bagasan ibana. Sian i ma taboto, hita di bagasan ibana. [10†]

⁶Na mandok, mian di bagasan Ibana, ingkon diparangehon ma songon Ibana. [11†]

⁷Ale dongan, na hinaholongan, ndada patik na imbaru na husurat tu hamu, patik naung leleng do, na di hamu sian mulana. Patik naung leleng, i do hata na binegemuna i. [12†]

⁸Tong do na imbaru patik na husurat tu hamu, sintong do i di bagasan Ibana dohot di bagasan hamu, ai na salpu ma na holom; nunga marsinondang nuaeng Panondang na sintong i. [13†]

⁹Halak na mandok di bagasan na tiur i ibana, huhut dihosomi donganna: Na tongtong dope mian i di bagasan na holom. [14†]

¹⁰Na holong roha di donganna, i do na mian di bagasan na tiur; ndang pargasipan ibana.

¹¹Alai na manghosomi donganna, di bagasan na holom do i; di bagasan na holom do dalanna. Ndang diboto, manang tudia ibana laho, ai dipapitung na holom i do matana. II.

¹²Hubahen surat tu hamu, angka anak, dibahen naung sesa dosamuna, ala ni Goarna i.

¹³Hubahen surat tu hamu, angka ama, ala ditanda hamu Ibana, na sian mulana i; hubahen surat tu hamu, angka dolidoli, ala naung ditaluhon hamu parjahat i; hubahen surat tu hamu, angka anak, ala ditanda hamu Ama i.

¹⁴Nunga hubahen surat tu hamu, angka ama, ala naung ditanda hamu Ibana, na sian mulana i; nunga hubahen surat tu hamu, angka dolidoli, ala margogo hamu, jala ala mian hata ni Debata di bagasan hamu, jala ala naung ditaluhon hamu parjahat i. [15†]

¹⁵Unang ma haholongi hamu portibi on, nang angka na dibagasanna! Anggo dihaholongi halak portibi on, ndang di bagasan ibana holong ni roha ni Ama i. [16†]

¹⁶Ai nasa na di portibi on, i ma lomolomo ni roha ni daging, giotgiot ni roha ni mata dohot na manenganengahon sinadongan, ndada sian Ama i anggo i, tung sian portibi on do.

¹⁷Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata. III.

¹⁸Hamu angka anaha, tingki parpudi do nuaeng; jala songon naung binegemuna, na naeng ro Antikristus i; nunga lan gabe Antikristus; sian i do taboto, nuaeng ma tingki parpudi. [17†]

¹⁹Sian tongatonganta do nian haroroannasida, alai ndang donganta nasida; ai aut donganta nasida, udur ma nasida dohot hita; alai naeng patar ma nasida, na so donganta saluhutna i. [18†]

²⁰Naung miniahan ni Na-badia i do hamu, jala saluhut hamu umbotosa.

²¹Hubahen pe surat tu hamu, ndada ala so diboto hamu hasintongan i, ala naung diboto hamu i tahe, jala ndang sian hasintongan nasa gabus.

²²Ise do sipargabus i, ia so na mansoadahon, na mandok: Ndang Kristus i Jesus? I ma Antikristus, na mansoadahon Ama i dohot Anak i.

²³Ganup na mansoadahon Anak i, ndang di ibana nang Ama i. Halak na marhatopothon Anak i, di ibana do nang Ama i. [19†]

²⁴Mian ma di bagasan hamu na binegemuna sian mulana i! Molo mian di bagasan hamu na binegemuna sian mulana i, mian ma nang hamu di bagasan Anak i dohot di bagasan Ama i. [20†]

²⁵Jala anggo bagabaga na pinarbagabaga na i tu hita, i ma ngolu na salelenglelengna i.

²⁶Angka i do husurat tu hamu taringot tu angka na mangaliluhon hamu.

²⁷Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu! [21†]

²⁸Nuaeng pe, angka anaha, mian ma hamu di bagasan Ibana, asa marhiras ni roha hita, di na gabe patar Ibana, unang tarila hita maradophon Ibana di harorona i! [22†]

²⁹Molo diboto hamu, tigor Ibana, boto hamu ma: Naung tubu sian Ibana do nasa na mangulahon hatigoran i. [23†]