Read Batak Toba 1 JOHANNES 3 Bible Online

1 JOHANNES 3 - Batak Toba bible

1 JOHANNES 3

¹I. [1] Ida hamu ma godang ni haholongon na binasabasahon ni Ama i tu hita, ai targoar do hita angka anak ni Debata, jala angka i do hita tutu. Dibahen i, ndang ditanda portibi on hita, ai ndang ditanda anggo Ibana. [24†]

²Hamu angka haholongan! Anak ni Debata do hita nuaeng, jala ndang dope dipapatar, manang na gabe aha hita sogot; alai taboto do: Anggo dung patar Ibana, gabe suman ma hita tu Ibana, ai idaonta do rupana sandiri. [25†]

³Ganup na mangkirim songon i di Ibana, diparbadiai ma dirina, songon Ibana na badia i!

⁴Pangalaosi do ganup na mardosa, ai pangalaosion do dosa i.

⁵Diboto hamu do, na mambuat angka dosanta do Ibana, umbahen na ro; ndang adong dosa anggo di bagasan Ibana. [26†]

⁶Nasa na mian di bagasan Ibana, ndang mardosa; ganup sipardosa, ndang dung diida jala ndang ditanda i Ibana. [27†]

⁷Hamu angka anaha, unang dipaotooto halak hamu! Siulahon hatigoran, i do na tigor, songon Ibana na tigor i. [28†]

⁸Sian sibolis do halak na mangulahon dosa, ai sian mulana do mardosa sibolis i. Laho manegai angka ulaon ni sibolis do, umbahen na ro Anak ni Debata. [29†]

⁹Ganup naung tubu sian Debata, ndang mardosa; ai na mian do di bagasan ibana boni i. Ndang tarbahensa mardosa, ai nunga tubu sian Debata ibana. [30†]

¹⁰Disi do tanda anak ni Debata dohot anak ni sibolis: Ndang sian Debata ganup halak na so mangulahon hatigoran, jala na so marholong ni roha di donganna. II.

¹¹Ai on do barita na binegemuna sian mulana: Ingkon masihaholongan hita. [31†]

¹²Unang ma songon si Kain, ai sian hajahaton do ibana, gabe dibunu do anggina. Dia do alana, umbahen na dibunu? Ala na jahat ulaonna; alai tigor do ulaon ni anggina. [32†]

¹³Unang ma longang rohamuna, angka dongan, molo dihosomi portibi on hamu. [33†]

¹⁴Taboto do, naung taripar hita sian hamatean tu hangoluan, ala tahaholongi angka dongan. Na so parholong ni roha, mian do di bagasan hamatean. [34†]

¹⁵Sibunu jolma do ganup na hosom roha di donganna; jala diboto hamu do, na so mian hangoluan salelenglelengna di nasa dibunu jolma. [35†]

¹⁶Sian on do tatanda haholongon ni roha: Sian ibana na mangalehon hosana humongkop hita. Hita pe, tama do talehon hosanta humongkop donganta. [36†]

¹⁷Molo adong paradongan di tano on, ia diida hurangan donganna, gabe dihinsu ateatena maradophon halak i, tung songon dia ma mian holong ni roha ni Debata di bagasan ibana? [37†] III.

¹⁸Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan. [38†]

¹⁹Disi ma botoonta, paboa sian hasintongan hita jala tapapos rohanta di Jolona.

²⁰Molo disolsoli rohanta hita, umbalga do Debata sian rohanta jala diboto saluhutna.

²¹Hamu angka haholongan, molo so disolsoli rohanta hita, marhiras ni roha do hita maradophon Debata. [39†]

²²Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana. [40†]

²³On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita. [41†]

²⁴Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita. [42†]