Read Batak Toba 1 JOHANNES 4 Bible Online

1 JOHANNES 4 - Batak Toba bible

1 JOHANNES 4

¹I. [1] Hamu angka haholongan, unang ma ganup tondi haporseai hamu; unjuni hamu ma, manang na sian Debata angka tondi; ai nunga borhat torop panurirang pargapgap tu portibi on. [43†]

²Sian on ma tanda hamu Tondi ni Debata: Ganup tondi ma marhatopothon Jesus Kristus, naung ro di bagasan daging, i ma sian Debata.

³Ganup tondi na so marhatopothon Jesus i, i ma na so sian Debata. I ma pangalaho ni Antikristus, na naeng ro i, songon naung binegemuna; jala nunga di portibi on ibana nuaeng. [44†]

⁴Sian Debata do anggo hamu, angka anaha; jala nunga ditaluhon hamu nasida, ai umbalga do Ibana na di bagasan hamu, asa na di bagasan portibi on.

⁵Sian portibi on do anggo nasida; dibahen i; sian portibi on do hatanasida, jala ditangihon portibi on do nasida. [45†]

⁶Sian Debata do ia hita. Halak na tumanda Debata, i ma na tumangihon hita; halak na so sian Debata, i ma na so tumangihon hita. Sian i do tatanda Tondi hasintongan dohot tondi sipaotooto. [46†] II.

⁷Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata.

⁸Halak na so marholong ni roha, i do na so tumanda Debata, ai haholongon do Debata.

⁹Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. [47†]

¹⁰Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do Anakna, bahen pardengganan pasaehon dosanta. [48†]

¹¹Hamu angka haholongan, anggo songon i holong ni roha ni Debata di hita, tama ma nang hita masihaholongan! [49†]

¹²Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohana i di bagasan hita. [50†]

¹³Sian on do taboto, hita mian di bagasan Ibana jala Ibana di bagasan hita: Ala naung nilehonna i tu hita sian Tondina i. [51†]

¹⁴Huida jala huhatindangkon hami, naung disuru Ama i do Anak i, bahen Sipalua portibi on. [52†]

¹⁵Ia i na marhatopothon, Jesus do Anak ni Debata, di bagasan ibana do mian Debata jala ibana di bagasan Debata. [53†]

¹⁶Nunga tatanda jala tahaporseai holong ni roha ni Debata di hita. Debata do haholongon i; jala halak na mian di bagasan haholongon, i do na mian di bagasan Debata jala Debata di bagasan ibana. [54†]

¹⁷Disi ma gabe tipak holong ni roha i di bagasan hita, pola marhiras ni roha hita di ari paruhuman i; ai songon Ibana, songon i do nang hita di portibi on. [55†]

¹⁸Ndang adong biar di bagasan holong ni roha i; alai dipabali holong ni roha naung rimpas i do biar i. Ai na bernit do anggo biar; jala ndang rimpas holong ni roha ni halak na mabiar.

¹⁹Marroha holong ma hita, ala Ibana jumolo mangkaholongi hita!

²⁰Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?

²¹On do patik na tajalo sian Ibana: Na mangkaholongi Debata, i ma na mangkaholongi nang donganna. [56†]