Read Batak Toba 1 JOHANNES 5 Bible Online

1 JOHANNES 5 - Batak Toba bible

1 JOHANNES 5

¹I. [1] Ganup na porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana. [57†]

²Sian on do taboto, naung holong rohanta di angka anak ni Debata: Molo tahaholongi Debata jala taradoti patikna.

³Ai on do holong ni roha di Debata; molo taradoti patikna. Ndada na dokdok patikna i. [58†]

⁴Ai nasa na tubu sian Debata do manaluhon portibi on. Haporseaonta i do naung monang manaluhon portibi on. [59†]

⁵Ise do na manaluhon portibi on, ia so na porsea di Jesus Kristus, Anak ni Debata? [60†]

⁶Ibana do i, naung ro marhitehite aek dohot mudar, Jesus Kristus; ndada holan di bagasan aek i, di bagasan aek dohot mudar, i do! Jala Tondi i do na mangkatindangkon, ai hasintongan do Tondi i. [61†]

⁷Ai tolu do na mangkatindangkon.

⁸I ma Tondi i, aek i dohot mudar i; jala sada do na tolu i.

⁹Ia panindangion sian jolma tajalo do; alai sumurung do panindangion na sian Debata, ai panindangion na sian Debata do on, na hinatindangkonna taringot tu Anakna i.

¹⁰Na porsea di Anak ni Debata, ditiop do panindangion i. Na so porsea di Debata, i ma mambahen Ibana pargabus, ala so porsea ibana di na hinatindangkon ni Debata taringot tu Anakna i. [62†]

¹¹Jala on do panindangion i: Naung dibasabasahon Debata do tu hita hangoluan salelenglelengna, jala di bagasan Anakna do hangoluan i.

¹²Ia di ibana Anak i, di ibana do hangoluan i; ia so di ibana Anak ni Debata, ndang di ibana hangoluan i. [63†]

¹³Umbahen na husurat angka i tu hamu, angka na porsea di Goar ni Anak ni Debata: Naeng botoonmuna, naung di hamu do hangoluan na salelenglelengna! II.

¹⁴On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita. [64†]

¹⁵Jala molo taboto, tangihononna do hita di nasa na tapangido, gabe taboto, saut ma di hita angka na tapangido i sian Ibana.

¹⁶Ia diida halak donganna, mangulahon dosa na so marhapatean tu hamatean, martangiang ma ibana, dung i basabasahononna ma tu ibana hangoluan; i ma di angka na mardosa na so marhapatean tu hamatean. Adong do dosa na marhapatean tu hamatean; ndang hudok, tangiangkononhon anggo i. [65†]

¹⁷Dosa do nasa hageduhon, jala adong do dosa na so marhapatean tu hamatean.

¹⁸Taboto do, na so mardosa nasa naung tubu sian Debata; alai na marsihohot tu Debata do halak, naung tubu sian Ibana, jala ndang tarhahua parjahat i ibana. [66†]

¹⁹Taboto, na sian Debata do hita, jala di bagasan hajahaton do nasa portibi on. [67†]

²⁰Alai taboto do, naung ro Anak ni Debata jala dilehon roha tu hita, asa tatanda Parsintong i. Di bagasan Parsintong i do hita, di bagasan Anakna Jesus Kristus. Ibana do Debata na sintong dohot hangoluan salelenglelengna. [68†]

²¹Hamu angka anaha, jaga hamu ma dirimuna maralohon debata sileban! [69†]