Read Batak Toba PANGUHUM 16 Bible Online

PANGUHUM 16 - Batak Toba bible

PANGUHUM 16

¹I. [1] Dung i laho ma si Simson tu Gaza, gabe diida disi sada boruboru sibabijalang, laos ditopot do.

²Dung tarbortik barita i tu isi ni Gaza naung masuk si Simson tu huta i, gabe dihaliangi jala dionggop nasida ibana di lambung bahal ni huta i manipat sabornginna i; alai sip do nasida manipat sabornginna i, ninna ma: Manogot marhira torang ari ma itabunu ibana.

³Alai modom do anggo si Simson ro di tonga borngin; tole tonga borngin i hehe ma ibana, ditangkup ma na dua pintu pargumbangan ni huta i, ro di tiangna na dua i, laos diumpat do ro di sordakna, jala diampehon tu abarana, jala diusung tu punsu ni dolok na di jolo ni Hebron. II.

⁴Dung i di laonlaon ni ari solo ma rohana mida sada boruboru marjonokkon sunge Sorek, si Delila do goarna.

⁵Dung i nangkok ma angka induk ni halak Palistim manopot parompuan i, angka ninna ma tu ibana: Sai hata i ma ibana, jala sulingkit manang dia parhitean ni hagogoonna na godang i, jala marhitehite aha tarpatunduk hita ibana, asa dapot hita ibana talionta laho paporsukporsukkon; ganup pe hami mangalehon tu ho saribusaratus rupia. [139†]

⁶Jadi ninna si Delila ma tu si Simson: Ua paboa tu ahu manang dia parhitean ni gogom na godang i, jala manang beha panalina di ho laho paporsukporsukkon ho?

⁷Dung i ninna si Simson ma tu ibana: Tung sura ditali ho ahu dohot pitu jorat angka na imbaru, angka na so pate hiang dope, tunduk ma ahu, gabe songon jolma sileban.

⁸Jadi diboan angka induk ni halak Palistim ma tu ibana pitu jorat angka na imbaru angka na so pate hiang dope, laos ditali parompuan i ibana marhite sian i.

⁹Alai juguk do di lambungna di bagasan bilut i angka pangonggop; dung i didok parompuan i ma tu ibana: Halak Palistim naeng mangarampok ho, ale Simson! Gabe dirapui ibana angka jorat i, songon tali bonang sada na metep binahen ni api; gabe ndang dapot diboto parhitean ni gogona. [140†]

¹⁰Dung i ninna si Delila ma tu si Simson: Ida ma, na dipaotooto ho do ahu, jala gabus do na pinaboam tu ahu; on pe sai paboa ma di ahu, manang marhitehite aha ho dapot talion.

¹¹Dung i ninna si Simson ma tu ibana: Tung sura ditali nasida ahu mansai momos dohot jorat na imbaru, angka na so dung dope pinangke tu ulaon, tunduk ma ahu, gabe songon jolma sileban.

¹²Dung i dibuat si Delila ma jorat angka na imbaru, laos ditali ibana marhite sian i, jala didok tu ibana: Halak Palistim naeng mangarampok ho, ale Simson! Alai juguk di bagasan bilut i hian anggo angka pangonggop; jadi dirapui si Simson angka jorat i sian tanganna, songon tali bonang.

¹³Dung i ninna si Delila ma tu si Simson: Rasirasa nuaeng sai dipaotooto ho do ahu, jala gabus do na pinaboam tu ahu; sai paboa ma tu ahu manang marhitehite aha ho dapot talion. Jadi ninna si Simson ma tu ibana: Tung sura didandani ho na pitu jengjeng buhit ni obuk ni ulungku rap dohot tali papaut. [141†]

¹⁴Laos dilabangkon muse dope tu dorpi, dung i ninna ma tu ibana: Halak Palistim naeng mangarampok ho, ale Simson! Jadi tarsunggul ma ibana sian na modom i, gabe dienet ma na pitu jengjeng buhitna nidandanan i rap dohot labang dohot tali papaut.

¹⁵Dung i ninna parompuan i ma tu ibana: Beha ma tardok ho holong rohangku di ho, hape ndang tu ahu rohami? Patoluhali on ma dipaotooto ho ahu, jala ndang dipaboa ho tu ahu manang dia parhitean ni gogom na godang i.

¹⁶Alai dung sai disulingkit parompuan i ibana ariari jala disosaksosak, gabe marpandelean ma rohana mangido mate. [142†]

¹⁷Dung i dipaboa ma tu ibana sandok sibunian ni rohana, ninna ma: Ndang dung hona raut parnabung ulungku, ai halak na pinapulik di Debata do ahu sian bortian ni dainang dope; tung sura tarnabung ulungku, sumurut ma gogongku sian ahu, jala tunduk ahu, gabe songon jolma sileban. [143†]

¹⁸Jadi dung diida si Delila, naung sandok sibunian ni rohana pinapatarna tu ibana, gabe disuru ma manjou angka induk ni halak Palistim mandok tu nasida: Sai nangkok dope hamu sahalion, ai nunga tung sandok sibunian ni rohana dipaboa tu ahu. Jadi nangkok ma mangulahi angka induk ni halak Palistim mandapothon parompuan i, laos diboan hepeng i di bagasan tangannasida.

¹⁹Jadi dung nok mata ni si Simson di ampuan ni si Delila, dijou ma sada baoa, asa dinabung na pitu jengjeng buhit ni uluna, dung i dipungka ma patunduk ibana, hape nunga sumurut gogona sian ibana.

²⁰Dung i ninna si Delila ma: Halak Palistim naeng mangarampok ho, ale Simson! Jadi tarsunggul ma ibana na modom i, jala ninna rohana: Ruar ma ahu songon na somal na sai laon, mangarunta ma ahu, hape ndang diboto naung sumurut Jahowa sian ibana. [144†]

²¹Dung i ditangkup halak Palistim ma ibana, jala dipulsikkon matana, jala dipatuat ibana tu Gaza, laos dirante ibana dohot dua rante tombaga, jala ingkon manduda ibana di bagasan bagas hurungan i. [145†] III.

²²Dung i di laonlaon ni ari mamungka martumbur mangulahi obuk ni uluna, suang songon na jolo tagan so tarnabung.

²³Dung i marluhut ma angka induk ni halak Palistim, naeng mamelehon sada pelean na bolon tu Dagon, debatanasida i, jala marhariburon, gabe didok nasida ma: Nunga dipasahat debatanta si Simson musunta i, tu bagasan tanganta. [146†]

²⁴Jadi dung diida situan na torop i ibana, dipapujipuji nasida ma debatanasida i, ai angka ninna do: Nunga dipasahat debatanta tu bagasan tanganta musunta i, ai mangago tanonta i, jala torop hita on binununa.

²⁵Jadi andorang marlas ni roha nasida, angka ninna ma: Itajou ma si Simson, asa riburan hita dibahen; jadi didokkon nasida ma mangalapi si Simson sian bagas hurungan i, gabe manontori ibana di jolonasida, dipajongjong nasida ma ibana di holangholang ni angka tiang partunggul. [147†]

²⁶Dung i didok si Simson ma tu dakdanak, na manogunogu tanganna: Loas ahu asa hujama angka tiang partunggul, ojahan ni bagas i, asa mangunsande ahu tusi.

²⁷Alai gok baoa dohot parompuan bagas i, disi do nang sude induk ni halak Palistim, gari di atas emper i adong do arga tolu ribu halak baoa dohot parompuan, angka na manonduri si Simson manontori.

²⁸Dung i joujou ma si Simson tu Jahowa, ninna ma: Ale Tuhan Jahowa! Sai ingot ma ahu, jala pargogo i ahu nanggo sahalion dope, ale Debata, asa hutubolhon sahalinari matangku na dua i tu halak Palistim.

²⁹Dung i dihaol si Simson ma tiang partunggul na dua i di tongatonga, ojahan ni bagas i, laos diaithon, sada di siamunna, jala sada di sihambirangna.

³⁰Dung i didok si Simson ma: Mate ma hosangku rap dohot halak Palistim! Laos digogo ma mangonjar, gabe runggang ma bagas i, manipa angka induk i ro di luhut halak angka na di bagasan; gabe tumorop angka na mate binununa di hamamatena i sian angka na binununa tagan di ngoluna.

³¹Dung i tuat ma angka hahaanggina ro di sandok pinompar ni amana, dihindat nasida ma ibana, laos diboan ibana nangkok, asa tanomonna ibana di holangholang ni Zora dohot Estaol, di parbandaan ni si Manoa, amana i. Alai duapulu taon do lelengna ibana manguhum Israel. [148†]