Read Batak Toba PANGUHUM 17 Bible Online

PANGUHUM 17 - Batak Toba bible

PANGUHUM 17

¹I. [1] Dung i adong ma sada baoa sian dolok Epraim, na margoar si Mika.

²Ro ma hatana mandok tu inana: Ia na saribusaratus rupia, naung mago sian ho, pola naung mamburai ho dohot tu pinggolhon hata i didok ho, ida ma, di ahu do hepeng i, ai ahu do mambuatsa. Jadi didok inana ma: Sai dipasupasu Jahowa ma ho, ale anaha! [149†]

³Dung i dipaulak ma rupia sisaribu saratus i tu inana, alai ninna inana i ma: Nunga husombasombahon hian hepeng i tu Jahowa marhite sian tanganku di anakku, asa dipauli sian i sada ganaganaan na niuhir dohot na tinuang, on pe mulak ma i tu ho hulehon. [150†]

⁴Alai dipaulak ibana muse hepeng i tu inana, gabe dibuat inana i dua ratus rupia, jala dilehon tu panopa, na mambahen sian i sada ganaganaan na niuhir dohot na tinuang; laos di jabu ni si Mika do i musengani. [151†]

⁵I ma dalanna umbahen adong sada joro ni debata hapunjungan ni si Mika, dung i dibahen ma sada baju epod dohot terapim, laos diurasi sada sian angka anakna pabangkithon gabe malimna. [152†]

⁶Di angka ari uju i ndang adong raja gumomgom Israel, ganup masibahen lomo ni rohana be. [153†] II.

⁷Alai adong ma sada dolidoli sian Betlehem Juda, na hinomit di marga Juda, jala halak Lepi do ibana, jala manompang ibana disi. [154†]

⁸Naung jalang do baoa i sian huta Betlehem Juda, asa manompang manang didia ibana sangkot; jadi dung ro ibana tu dolok Epraim sahat tu bagas ni si Mika, naeng manulus dalanna nian. [155†]

⁹Jadi ro ma hata ni si Mika tu ibana: Sian dia ho ro? Gabe didok ibana ma mangalusi: halak Lepi do ahu sian Betlehem Juda, jala na mardalani do ahu naeng manompang manang didia ahu sangkot.

¹⁰Dung i ninna si Mika ma tu ibana: Tading di lambungkon ma ho! Asa gabe ama dohot malim di ahu; lehononku ma tu ho sampulu rupia sataon, jala singkop pangkean dohot bohalmu, gabe dioloi halak Lepi i ma rap dohot ibana. [156†]

¹¹Jadi lomo ma roha ni halak Lepi i maringan di lambung ni baoa i, jala doshon sada sian angka anakna sandiri dolidoli i dibahen.

¹²Dung i dipabangkit si Mika ma halak Lepi i, bahen malimna dolidoli i, laos maringan ibana di jabu ni si Mika. [157†]

¹³Dung i didok si Mika ma: Nuaeng pe tangkas huboto, sai tumpahan ni Jahowa do ahu, ala naung halak Lepi gabe malim di ahu.