Read Batak Toba 3 JOHANNES 1 Bible Online

3 JOHANNES 1 - Batak Toba bible

3 JOHANNES 1

¹I. [1] Ahu surat ni sintua i mandapothon si Gayus, haholongan i, na huhaholongi situtu. [1†]

²Ale anggia, sandok dipangido rohangku, naeng horas ho jala hipas, hombar tu horas ni tondim! II.

³Tarhilas situtu do rohangku, di na ro angka dongan i mangkatindangkon hasintongan na di ho ro di parangem, na di bagasan hasintongan. [2†]

⁴On do las ni rohangku na umbolon: Molo hubege, diparangehon angka anakkonku hasintongan i.

⁵Na denggan do pambahenmi, anggia, na tu angka dongan, nang tu angka tamue.

⁶Dihatindangkon nasida do holong ni roham, di jolo ni huria i. Denggan ma paborhatonmu nasida, marguru tu na tama di Debata. [3†]

⁷Ai ala ni Goar i do nasida borhat; ndang adong dijalo nasida agia aha sian angka parbegu. [4†]

⁸Dibahen i, tama ma hita manjangkon angka na songon i, asa gabe dongan pangula hita, pajongjong hasintongan i. [5†] III.

⁹Hubahen do surat tu huria i; alai ndang dijangkon si Diotrepes hami, ai naeng ibana do na guminjang.

¹⁰Dibahen i, anggo dung ro ahu, taringotanku ma pambahenna i, na niulana manihasnihasi hami marhitehite angka hata na roa. Jala ndang sombu dope rohana disi; ai laos so dijangkon do angka dongan i, diambat do angka na ringkot roha jala dipabali do sian huria.

¹¹Unang ihuthon na roa, anggia; na denggan i ma! Sian Debata do halak na mangulahon na denggan; ia siula na roa, ndang dung diida i Debata. [6†]

¹²Dapotan panindangion do si Demetrius sian saluhutna, nang sian hasintongan sandiri; songon i do nang sian hami, jala diboto ho do, na sintong do anggo panindangion na sian hami. [7†]

¹³Godang do nian sisurathononku tu ho; alai ndang une rohangku, manurat tu ho marhitehite tinta dohot panurat. [8†]

¹⁴Alai dihirim rohangku, naeng tibu ho idaonku, dung i mangkatai ma hita adop bohi be.

¹⁵Dame ma di ho! Na manongos tabi do tu ho angka dongan. Pasahat ma tabingku tu angka dongan sadasada!