Read Batak Toba PANGUNGKAPON 1 Bible Online

PANGUNGKAPON 1 - Batak Toba bible

PANGUNGKAPON 1

¹I. [1] On ma pangungkapon ni Jesus Kristus, na nilehon ni Debata tu Ibana, asa tu angka naposona patuduhononna na naeng masa tibu, gabe saut dipatuduhon, ai ditongos do marhite sian surusuruanna tu naposona, Johannes. [1†]

²Dihatindangkon ibana do hata ni Debata dohot panindangion taringot tu Jesus Kristus: Nasa na niidana. [2†]

³Martua ma na manjaha ro di angka na umbege hata panurirangon on, angka siradoti na tarsurat dison; ai jonok do ari i! [3†]

⁴Ahu surat ni si Johannes mandapothon na pitu huria na di Asia: Asi ni roha ma di hamu dohot dame sian Ibana na mangolu i, naung mangolu hian jala na naeng ro, nang sian na pitu Tondi na di adopan ni habangsana, [4†]

⁵nang sian Jesus Kristus, Sitindangi haposan i, na parjolo tubu sian angka naung mate, Sigomgom angka raja ni tano on! Ibana do mangkaholongi hita jala dipalua hita sian dosanta marhitehite mudarna. [5†]

⁶Dijadihon do hita gabe harajaon hamalimon di Debata, Amana i: Di Ibana ma hasangapon dohot hagogoon ro di salelenglelengna! Amen. [6†]

⁷Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen. [7†]

⁸Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna! [8†] II.

⁹Ahu Johannes, donganmuna jala rap dohot hamu partohap di haporsuhon dohot di harajaon nang di habengeton na di bagasan Jesus; di pulo na margoar Patmos do ahu uju i, ala ni hata ni Debata dohot ala ni pangkatindangkon di Jesus. [9†]

¹⁰Naung di bagasan ari ni Tuhan i do ahu di bagasan tondi, gabe hubege di pudingku soara na gogo, suman tu soara ni sarune. [10†]

¹¹On do didok: Surathon ma na niidam tu sada buku jala tongos ma i tu na pitu huria, i ma Epesus, Smirna, Pergamos, Tiatira, Sardes, Piladelpia dohot Laodikea! [11†]

¹²Gabe humusor ma ahu marnida Parsoara, naung mangkatai i dohot ahu. Jadi dung humusor ahu, huida ma pitu parpalitoan sere. [12†]

¹³Jadi di tongatonga ni angka parpalitoan i huida ma na suman tu Anak ni jolma, na marsampesampe jala marhohos sere di pamatangna. [13†]

¹⁴Mamontar do simanjujungna ro di obukna, bontar songon hapas, saksak songon hapur; jala songon nala ni api do ia matana. [14†]

¹⁵Ianggo patna songon haksa na nilala di bagasan pamurunan, ia soarana songon parhasak ni aek godang. [15†]

¹⁶Ditiop do pitu bintang di tanganna siamun, jadi ruar do sian pamanganna podang siduababa na tajom; songon mata ni ari na maringaringar do ia sondang ni bohina. [16†]

¹⁷Disi huida Ibana, tinggang do ahu tujolo ni totna, songon naung mate; gabe diampehon Ibana ma tanganna siamun tu ahu, huhut ma didok: Unang ho mabiar, ai Ahu do Parjolo jala Parpudi! [17†]

¹⁸Ahu do Siparngolu; naung mate do Ahu najolo, gabe mangolu antong ro di salelenglelengna; di Ahu do anak hinsu ni hamatean dohot banua toru!

¹⁹Onpe, surathon ma na niida ni matami, i ma na masa nuaeng ro di na naeng masa, dung salpu on:

²⁰Hahomion ni bintang na pitu, angka na niidam di siamunhu, dohot parpalitoan sere na pitu i: Ia bintang na pitu i, angka suruan ni na pitu huria do i, ia parpalitoan na pitu i, i ma na pitu huria i. [18†]